USA liata MEC Local Church Sâ 2- na Charlotte, NC lia padua

Charlotte, NC (MEC USA) – Khazohpa ta Marasaw zy kyh â pachâna cha vaw palasa heita Ano Moh parohnahsa awpa nata Ano chakao ta A bie  zy awpa nata Ano rai rohnahpa hria awpa â khona vâta USA râh North Carolina State, Charlotte Khipi liata a pahrapa Marasaw zy ta Mara Evangelical Church cha 19.01.2013 nohta ama vaw paduapa cha Pahanoh, Hmypi (Feb.) 3, 2013 khâta ârohna kawpa ta pahyna ama hnei.

He Local Church pahyna nata chhithatuhpazy chahnaona/pa-ina ahmana service he Pahanoh, February 3, 2013 noh khâta ahmapa a châ.

He ahmana service liata ahlao awpata hruapa Maryland, MEC Local tawta Pastor Cho U, Awnanopa Nopaw zydua nata KTP sahlao zy chyhsa (33), Van Cars Sa 3 ta sie pata cha ahmana service cha ama hlao thei.

Feb. 2, 2013 noh 3:00 pm ta Htp. Mara Hrato O liata awnanopa nopaw zyta Local thiehpa atyudua n’awpa thatih reipa châta, Khazohpa thatipha nata apakyhna châ zâ 7:00 tawhta pathaopa châta; Mc. Vatei (MEC, Maryland) ta daihti siekhei ta Pastor Cho U nata Mc. Conference ta Khazohpa thatipha bie reina ama hnei. Hlâ nata Bie paha ngâsâ ta awnanopa khochhihpa thokha lâ hlâ chhao sa thei khao leipa ei ta, Abeipa hnota ama lyna mothlih ama palo. Khazohpa rohnahna âlâ hmeiseih.

Mc. Conference ta 1 Kawrini 6: 8, “Nâmo châ Khazohpa achhyna o nama châpa âpahno vei chi ma,” tahpa atlychakapa ta Pathaina hro rei ta, he khai tawta Marapa râh khotho lâta a ypa Marasaw zydua Mara Evangelical Church thâtih siapa eima chu via awpa ângia zie nata eima pahnopasia awpa a peimaw zie â rei.
Pastor Cho U ta â biehmiapa liata MEC, ECM awnanopa zyta Marapa râh khotholâ eima pua tita eima châna mypa ta MEC zy ECM zy sie saita, awnanopa py hropa liata palohpaha kawpa ta y thei thlahpa nozâ âchhih zie, eima missionary hnochaipa eima mano Rev. Vaili (Rev. Violet Lorrain Anne-Mark) â mo â padei thla hâ chyta, â hmiakhâ âchhih lei zie pasyuna biereina â hnei. He khai tawhta Hlazy 77: 11 “Abeipa, nâ hmotao rohnahpazy ei thei thlah hâ aw; Daihti kho hâpazy liata hmonoâhpa nâ taopa zy ei thei thlah hâ aw,” tahpa bie atlychakapa thatipha bie reina â hnei.

Zawsua nata Kaleba Kânâ râh riahpha kawpata â pangiasa hawpa châ Khazohpa ta Izie râh liata hmo noâhpa âtaopa zy, râhpathopa liata hmopha  âtaopa zy, hmo noâhpa âtaopa zydua ama zahmo papua thaina kha a châ. Chahawta hawti Davi ta râroh ykawpa Kawliatha adyu ngah thlana chhapa châ Mitakupa âvai nota sâhrapa Chavy nata Chakeibarohneipa â pahniena, Khazohpa ta â chhah â chah vata â pahnie theina khâ â zasaipazie thai vata a châ. Châhawta keimo chhao eima tahra awpa a châ. Local thiehpa paduana liata mo chy kaw chy hra ei sila Khazohpa ta Marapa saw zydua hnota hmophâpa, hmonoâhpa â zataopa zydua eima zâ mo khia tala châ châta riahpha kawpa ta hmialâ m’iah âpasiesa aw tapa rei ta, anathlietuhpazy ngiapana thâ âpatlosa hmeiseipa ta pahnopa a châ.

Feb. 3, 2013 Pahanoh 10:30 am ta Local thiehpa cha Pastor Cho U ta pahy ta Local chhihtuhpa zy chahnaona nata pa-ina chakaona ahnei. He ahmana pakhyna he Mc. Zahu (Htp. MEC, Maryland) chhitha ta Rev. John Byna ta Isai 54:2 “Napo O su pakaw te” tapa bie atly chakapa ta, Marasaw zydua eima yna, eima pahrana mai ta eima Po O su eima pakaw lyma awpa acha tapa thatipha rohnah kawpa reina ahnei. KTP sahlao zyta hlapy phakawpa sa eita, mo pakha hlasana zyta Khazohpa rohnahna thata ama palasa hmeisei.

Awnano Macha ta chahnaopa zydua 1) Puhpa Bie U (Aru), 2) Puhpa Lezahmo (Lelaipi) zy cha eita, Khichho Macha ta Pa-ipa zycha 1) Puhpa Sahmo (Chakhai), 2) Puhpa Nawsa (Aru) zy ama cha.

He local thiehpa liata a ypa awnanopa khochhipa zydua nata chhituhpa zydua chata nama theina hawta thlachha nama deichhy lyma bei awpa a ahawna hneipa nama cha.
North Carolina MEC Local Chhiuhpazy:
Htp. Mara Hrato* (Chakhai) – Chairman
Mc.   Bie U (Aru) – Secretary
Mc.   Lezahmo (Lelaipi) – Treasurer
Km.  Sahmo (Chakhai)
Km.  Nawsa (Aru).

 

Leave a Reply

Your email address will not be published. Required fields are marked *