Ei Vaw Pachâ Tyh (1)

 

Chyhsazy pi ta biezy ta eima pachâpazi tyh. Chavâta “Reih” nata “Pachâna” he a zaona ama hnei. Reih heta chyhsazy eima pachâna zie nata eima hmôna dâh chôta bie a hnei thlu.

Chyhsapa pachâpazina chôta bie a hnei theipa Reih nata a zaopata ei vaw laichadai hra. A sanawhna, heihnawh châna nata a zaopa bie pachâ tua ei suh vy. Burmese Reih liata Mara Reih hawhta tlaita “uhta (a-kô), nawhta (nyi) ” tahpa bie sâkha chyu ama hnei. Mongyuh reih deikua cha “unawh (brother)” tahpa mohchho sâkha dei ama hnei.

He he Mongyuh mozy hlâta eima pachâna a kawh viana sâkha a châ.

Ei Vaw Pachâ Tyh (2)

Reih siezie hawhta a cheihtuhpazy cha khizaw he saipazipata ama pachâ tyh. “Reih” tahpa he chhâ zydua chhôhta ryu ta topa a châpa hawhta a Reih a cheihpa mopho tawhta chipathlapa chata a Reih nata a Reih tawhta a pikheipa pachânazie nata hmôna dâh chhao to pâ ta, cha Reih lymâ hawhta eima pachâ tyh hra.
Cha hawhta a châ khiahta cha, keimo ta nohchareih eima cheihpa Mara Reih heta Marapa pachâzie nata hmôna dâh khâpa e maniah a pahnosa tahpa na pachâ tyh vâ ma?

Ei Vaw Pachâ Tyh (3) 

Thâtih tlohpa sâkha ama roh tita Hawhrawh hmâpata Bie (mohchho) taopa châ ta, biezy pahlyhpata Bietlâh (Bietlohpa) tao pachhuahpa châ heih ta, Bietlâhzy paryhpakhypata Biehlypa taopa a châ. Biehlypazy ta Thâtih Tlohpa taopa a châ. Cha hawhna hra chata Thâtih Tlohpa sâkha ei vaw laichadai nota Bie ama hmâpa, Bietlâh a taona dâh, Biehlypa a paryhpakhyzie, thâtih a patlohsana dâh tahpata a chhâh chhâhta eima  vaw laichadai tyh awpa a châ.

Ei Vaw Pachâ Tyh (4)

Reih sâkha liata mohchho biezy he py no ta pachhaih theipa a châ. Py hmia tuapa liata chyhsa, viahchao, o, siku, pachutuhpa, râh, pathipalôh, sie, vawh, a saih, a vyh, kyh pachâ, zawhngiah tahpata phohro a pamosapa biezy a châ. Reih chyu liata cha hawhpa mohchho hluhpi a y. A tôhpipa a châ hra. Cha hawhpa bie sâkha chyu ta phohrozy a pahnosa hra. Yzie siapa ama hnei chyu hra. Cha hawhpa Bie cha yzie a pamosapa tah awpa a châ.

A pazipa cha “awpa, cha, he, liata, lâta, nawpata, ta, tawhta, vâta, zawhzi” etc. tahpazy châ ta, a chyhta dei a y. He Biezy ta phohrozy pahnopasiasa thei vei. A hmiatuapa py liana khata chyhsa, o, pathipalôh, sie, vawh tahpa mohchhozy ta hro hneipa, hro hnei leipa, hria theipa nata hria thei leipa, yzie, nôchâ, pachâna palôhphaoh zy a palâpasia tarawpata, a pazipa py (“awpa, cha, he, liata, lâta …” tahpazy) deikua chata ta phohro nata a zaopata khâpahmâh phuah pasia thei vei. Amosasyh deita yzie hnei thei hra vei ei. Bietlâh chhôh liata mohchho yzie a hneipa ama pazao raihrina zie pamosa nawpata hmâpa a châpa vâta Bie raihriazie a pamosapa eima tahpa a châ.

Ei Vaw Pachâ Tyh (5) 

Châ bie he nohchareih chyhsa hmâpa a châ. Châ bie phapa deikua cha a sôh. Châ bie a phapata a roh thaipa chi phozy cha laiseih via rili ei ta, ama chi phozy chhao a laipha via lymâ tyh.

Châ rohdâh nano nanopata eima roh tita “hawhrawh pazao awpa, pazao lei awpa” “Cha hawhta eima roh khiahla ado aw vei, kha hawhta ta eima roh khiah ado aw vei” tahpa a einazy a vaw pua thei.

Reih sâkha liata ama khodâh hawhta ama roh raihrina a chhâpa sâkha cha “Spelling dictionary” nata “Writing System” ama hnei mâh leipa vâta a châ.

Ei Vaw Pachâ Tyh (6)
 

Atanoh khizaw liata Châ ahnei mâh leipa Reih hluhpi a y chy. Châ hnei leipa hlâta hneipa cha pha via ta, châ roh dâh hnei leipa hlâta châ roh dâh hneipa chhao a pha via syulyu. Mara châ eima hnei tawhta kô hluhpi a tah haw ba.

Mara châ nata Mara reih siezie a nanozie eima laichaidai via lymâ khiahtala, reih nata a zaopata eima pahnona chhao a kawh via laih aw.

Ama Reih a pabohsa khohpa chiphozy ta Châsâ pahlyh dâh (Spelling) ama vaw taopathi haw.
Châ eima roh tita Spelling he a peimawh kawpa a châ. Spelling he Châ bie luh tah theipa a châ.

Spelling â dopa ta roh cheingei awpa tahpa châ sala, chyhsa hluh via ta Châ Roh Khoh Khao Aw Vei Ei. Ama hnabei a dy khai ha aw.

Châsâ-hawhrawh, bie-mohchho tahpa cha chyhsa pakah tawhta a puapa ao/pyu ngiana ma-â a châ mâta. Chavâta “Eima rei thai khiah, eima pahno thai khiahla â daih thlâh na” tahpata eima khoh dâh hawhta roh/chapai chyu awpa châ vei.

Liahsa a paraohpata dâh/ryh/yzie eima hnei awpa abyuh ta, cha hawhpa châ roh dâh/ryh/yzie hnei thei awpa cha Mara châ athai hmeihseihpazy ta châsâ-hawhrawh pakao dâh pamosana ri (standard) sâkha hnei thei ei sihla, a pha kaw aw.

Comments

Add New Search RSS

Write comment

Name: Email:   Website: Title: UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge     Please input the anti-spam code that you can read in the image.

Powered by !JoomlaComment 3.26

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."