Biehrai—Khazohpa Tawhtapa Châbu Sôhpa

Viasa khoh ngaitapa pakha ta lâsy (hmosaipiepa) a cha piena daihti kha nâ thei khao ma? Cha hawhta lâsy piepa cha aly achhih kawpa a châ. Cha lâsy chata nama viasana a pasô tahpa a cha pahnosa. Na viasapa, lâsy cha pietuhpa hnohta alyna bie na rei cheingei aw tahpa â sia.

Biehrai cha Khazohpa tawhtapa aly achhih kawpa lâsy sôhpa miakha a châ. Biehrai chata kheihawhpa su liata hmâh hmô thei leipa thâtihzy miah a pahnosa. Alei nata avâzy, chyhsa taopa ama châna thâtih zy miah a chhopasia. Hrochhôh liata rairu-buabâna nata nôpo-vâsâhna zy, palôh rietheina zy pahnie theina lâthôhzy cha Biehrai liata hmô theipa a châ. Khazohpa ta â chhuahna a vaw paki theizie nata aleilô liata hro pahâsa via theinazie zy chhao miah a chhopasia. Biehrai cha lâsy pha ngaitapa sâkha a châ.

Biehrai heta Zehôva Khazohpa, Biehrai maniah a pietuhpa thâtih chhao maniah a pahnosa theipa vâta lâsy khohchhihpa a châ hra. Cha Biehrai maniah a piepa chata ano thâtih liahsa eima pahno awpa a khoh tahpa a palâhâh. Chathohta, Biehrai heta Zehôva hnohta a hnia via thei nawpata miah a phahnai thei.

Biehrai na hnei ma? Na hnei tlai aw. Biehrai he reih 2,300 hlei, bu thy nata sâh hluhpi ta chhuhpapuapa châ haw tlôh ta, khizaw chyhsa maluh zachhaisu 90 hlei ta hnei theipa a châ haw. A vâtlâhpata, hâta chareih ta Biehrai bu thyzakha hlei papuapa a châ! Chavâta Biehrai hawhpa châbu rai y vei tahpa â sia thlâh.

Tawhla, Biehrai cha ‘Khazohpa huso thlupa a châ.’ (2 Timawthy 3:16) Kheihta zieta e? Biehrai tlai chata ‘Khazohpa mopathaihpazy chata thlahpa huso thlupa vâta ama chho’ a tah. (2 Pity 1:21) He hawhta pakho theipa a châ: Rai hyutuhpa pakha ta Seketari pakha châ a parohsa. Cha châ liata Rai hyutuhpa pachâna, khohna nata chhihthana zy chapai/rohpa a châ. Chavâta cha chârohpa cha Seketaripa eih châ leipata, Rai hyutuhpa châ tlao a châ. Biehrai chhôh liata Khazohpa bietapazy chhao a y hra. Cha vâna chata Biehrai cha a rohtuhpa chyhsazy châbu, chyhsazy bie châ leipata, Khazohpa Bie tlao a châ. Chavâta, Biehrai he tlokhuhta “Khazohpa bie” a châ hmeihseih.—1 Thesalawnika 2:13.

Biehrai he kô 1,600 hlei chhôhta rohpa a châ. Arohtuhpazy cha chyhsa nanopazy, su nano, daihti nano, chhâ nanopazy tawhtapa ama châ. Thokha cha lyuthlyupa zy, ngapatutuhpa zy, mietaku vaihtuhpa zy châ ei ta, thokha cha hrosohpa zy, ryureituhpa zy, abei zy ama châ. Luka thâtihpha nata Hmotaopa a rohtuhpa cha dawhty a châ. Biehrai arohtuhpazy cha chyhsa nanopa, duahmo nano a hneipa zy ama châ tarawpata Biehrai cha hmiahnôh araohna ahnei ngaitapa châbu a châ.

Biehrai athaona bu liata chyhsa buabâna â vaw thaonazie maniah a chho. A hnôh chaipa bu liata aleilô zydua paradi (peirâh), sadô khoh chhihpa lâta â vaw lie aw tahpa miah a pahnosa. Biehrai chhôh liata chyhsa chhâ hluhpi thâtihzy a hlao ta, Khazohpa achhuahnazy miah a chho. Biehrai hmia-hnôh â raohna cha noâh chhihpa a châ, Khazohpa tawhtapa a châpa vâta.

Biehrai cha khizaw sohsâhna (science) lâchhâh chhaota âdo paki. Chhâ nata daihti a chhichhaopa thâtih hluhpi â hlao hra. Hlâno Izarel sahlao châta pasana hri khawhlôna, hri-iah pasiana, iepazô sâna tahpazy nata a zaopa ryhpazy y ta, cha daihti nota ama chheipâh râhzy ta cha hawhpa cha vaw pahno mâh vei ei. Eikha nota chyhsazy ta aleilô cha a phiapa a châ tah ei ta, Biehrai deikua chata a pôlôpa/padôpa a châ a tah. (Isaih 40:22) “Alei cha khâpahmâh y leina liata a bahai” a tah heih. (Zawba 26:7) Biehrai he khizaw sohsâhna châbu châ vei. Anodeikuacha khizaw sohsâhna kyhzy liata â do paki hra. Khazohpa tawhtapa châbu cha cha hawhta a châ awpa tlai a châ.

Biehrai cha khizaw thâtih (history) lâchhâh chhao ngâchhihpa a châ. Biehrai thâtihzy cha âdo paki. Hlâno daihti nota chyhsa mohzy deita châ leipata, pathlapachhuah laihpa ama chânazie thâtih chhao â hlao. Pamosana ta, Luka 3:23-38 liata Zisu pathlana thâtih rohpa a châ. Chyhsazy ta ama chi nata pho phahlana nata diathlanazy roh tyh vei ei. Biehrai arohtuhpazy deikua chata ama chi pho diathlana, phahlana, moleinazy â dopata ama vaw roh. Biehrai chhôh liata Maluh Reina Bu a rohtuhpa Mawsi ta ano taosina thâtih vâta thata rapa a châzie a palâhâh. (Maluh Reina 20:2-12) Abei Davi moleinazy rohpa a châ hra. Cha hawhta sia ngaitapata ama rohpa cha Khazohpa husothlupa a châpa vâta a châ. Cha hawhpa adona cha thâtih hropazy liata hmô theipa châ leipata, Biehrai chhôh liata deita hmô theipa a châ; cha cha Khazohpa tawhtapa a châpa vâta.

Hlâno kô 3,500 lai ta Hebrai reih ta rohpa châ ta, kô 2,200 alei ha nata reih hropazy ta paliepachhuahpa a vaw châ. Atanoh alei chô liata chyhsa tota ama reih chyu ta reih theipa a châ haw. Biehrai tluta ama palie hluhpa châbu rai y vei.

Atanoh, “Best-seller” ama tahpa châbu zydua hlâta alie hluhpi ta papuapa a châ. Kôchareih ta bu thysâh hluhpi papuapa a châ. Alei kheihawhpa su lia raita Biehrai hmô thei leina su y khao vei. Biehrai tluta ama chhuh hluhpa châbu hropa rai y hra vei.

Eikhanota Biehrai he reih hropa lâta palie pasaihpa châ leipata, hnei pasaihpa vaw châ hra vei. Chhuh pasaihpa châ hra vei. Biehrai adyuhtuhpazy ta Biehrai he mei ta rao ei ta, pahleipadia ama vaw chhuah. Cha cha Sâtâ raihriana a châ. Cha hawhta a châ tarawpata Biehrai cha dyuhtuhpa hluhpi, pasiana hluhpizy vaw pahnie khai, vaw tiah khai ta, a vaw pôh thlâh haw. Cha hawhpa châbu hropa rai y beih vei. Cha cha Khazohpa tawhtapa a châpa vâta a châ.

Biehrai he Khazohpa tawhtapa châbu a châpa vâta eima pahno khohpa biehiahrina peimawhpazy (Hrona he khataih tawhta a vaw ypa e a châ? He khizaw liata eima hro chhânapa cha khâpa e? Eima hmialâ daihti he kheihta e a vaw y aw?) chhao a chhôh liata a chhypa a châ. “Zehôva thlahpa chata keima hmâpata reih ta, a bie cha ei paleih liata a vaw y.” (2 Samuel 23:2) “Khazohpa Châ bie to he Khazohpa husothlupa a châ.” (2 Timawthy 3:16) Biehrai tlaita Khazohpa Bie a châ tahpa maniah a chho.

Biehrai cha Khazohpa husothlupa a châpa vâta “pachuna kyh liata zy, thailei pachâsana kyh liata zy, chhoreina kyh liata zy, siana pachuna kyh liata zy a phahnai.” (2 Tim 3:17) Chatatly, Biehrai cha a phahnai hmeihseihpa nata hmâ tlâhpa a châ. Chyhsa yzie pikheipazy a pahno thai. Maniah ataotuhpa Zehôva Khazohpa tawhtapa a châpa vâta cha cha noâh chhihpa châ vei! Ano chata eima pachâna nata eima palôhphaozie chhao liahsa maniah a pahno khai. Nohlaopazy, alypazy eima châ thei nawpata eima byuh eima ngiahpazy chhao Bei Zehôva ta a pahno. Lâthlôh eima charei awpazy nata eima zeih awpazy chhao a pahno hra. Chazy cha Biehrai chhôh liata phuahpa a châ.

Mathai Bo 5 tawhta Bo 7 chhôh liata rohpa tlâh liata Zisu Biereina kha pachâ tua. Cha cha a pha chaipa pachuna châ ta, nohlaona (alyna) hmeihseihpa hmô theina dâh zy, buabâ eichhianazy pahnie theina dâh zy, thlahchhâna dâh zy, khizaw sôh chôchâh liata palôhphaoh phapa zy eima hmô thei. Zisu biereipazy cha atanoh taihta phahnai chy ta, hmah a sie lyma chy.

Biehrai ryhpa thabypa (principles) thokha cha chhôhkha hro, raihria, mo hropa akaonazie zy ama châ. Biehrai ryhpa thabypazy cha chi to, pho to, chyhsa zydua châta châ tlôh ta, Biehrai pachunazy, ryhraonazy cha a phahnai lyma thlâh ha. Biehrai chhôh liata hmôpa sohna cha hrosohpa Isaih pakah ta he hawhta phuahpa a châ: “Kei he Zehôva nama Khazohpa, nama phana awpata nâmo pachutuhpa, nama siena awpa lâpi liata cha chhihthatuhpa ei châ.”—Isaih 48:17.

Biehrai chhôh liata chhochhilina hluhpi a hlao ta, a hluh via cha â vaw ki haw. Pamosana ta, sâkha pachâ pachhi. Zehôva Khazohpa ta B.C. kôzabi sâchariena liata hrosohpa Isaih pakah ta Babylaw khihpi cha pahleipadiapa a châ aw tahpa a vaw chhochhili. (Isaih 13:19; 14:22, 23) Cha hawhta a vaw y awpazie taihta chhopasia chhilipa a châ. Pheisaih râh alapa sahlao chata adyuh leipata, Babylaw chavah ti pakuapata khihpi chhôh liata ama vaw ngiahnao aw. Isaih chhochhilina liata Babylaw a pahnie awpa bei Kôrasa (Sairas) moh taihta a vaw reih chhili.—Isaih 44:27­-45:2.

Kô 200 rachhôh alei ha nata B.C. 539 kô, Phiata (October) thla 5 noh zâ ta pheisaih sahlao hlaokha cha Babylaw khihpi chheipâh liata rihmo ama vaw tu. Cha pheisaih sahlao hyutuhpa cha ahy e? Pâsia bei Sairas a châ. Biehrai chhochhilipa hawh tlaita hmozy a vaw y pathao haw. Anodeikuacha chhochhilipa bie hawhta Sairas pheisaih sahlao chata adyuh leipata Babylaw khihpi cha ama la thei aw ma?

Cha zâ tlaina chata Babylaw mozy chata kyhchhi rôhnahpa tao y ta, ama khihpi ku rôhnahpapi chhôh liata thlahlôh ngaitapata ama y. Sairas chata Babylaw khihpi chhôh liata a ngiapa chavah cha su hro lâta palohsa ta, chatanachata pheisaih sahlao ama chaka theina taihta vahti cha vaw kua ha ta, khihpi ku lâta amâ vaw hnia haw. Sairas pheisaih sahlao chata Babylaw ku dôhkhâhpa liata kheihta e amâ vaw ngia thei aw? Hmo kheihawhpa vâta tlyma cha zâ pyly liana chata khihpi ku chhikaozy cha a pahypata a vaw y thlâh haw.

Babylaw khihpi kyh liana chata he hawhta chhochhilipa a vaw châ: “Khatita hmâhta cha liana chata chyhsa pahrâ khao leipa aw ei ta, chhâ y chhôh zydua chata a chô liata a pahrâpa y hra aw vei ei; Arabia chyhsazy ta cha liana chata ama poh-o cha parai hra leipa aw ei ta, mietakuvaihtuhpa ta cha liana chata ama mietakupa zawzy cha pabyusa aw vei ei.” (Isaih 13:20) Cha chhochhilipa cha khihpi lapata a yna kyh dei a reipa châ vei. Babylaw khihpi cha chhâzaw ta roryhrapata a y aw tahpa a palâsa. Cha biezy â vaw ki haw tahpa na hmô thei. Chyhsa ama pahrâ khao leina Babylaw khihpi parohpa cha tahmâ Irak râh, Bakadak khihpi tawhta mawlâ me 50 hryh a hlapa su liata a y. Cha chata Babylaw cha “pahleipadiana ophi ta ei phi aw” tahpa hrosohpa Isaih pakah ta a reipa Zehôva bie a vaw tloh pakina a palâsa. (Isaih 14:22, 23) Babylaw leidiana he Biehrai chhochhilipa biezy hryta sâkha a châ. Tyre nata Niniva raona thâtih zy a y hra. (Ezekiel 26:1-5; Zephania 2:13-15) Babylaw leidiana thâtih cha Biehrai chhochhilipa a vaw tloh hawpazy hry liata miakha a châ. Tyre nata Ninaveh khihpi leidiana thâtihzy chhao â hlao. (Ezekiel 26:1-5; Zephania 2:13-15) Daniel chhochhilina liata Babylaw ryureina khai tawhta a vaw luah awpa khizaw râh hrâhpazy thâtih â hlao hra. Cha liana chata Medo-Pasia nata Krika zy ama hlao hra. (Daniel 8:5-7, 20-22) Zisu Krista chôta a vaw tlôpa chhochhilinazy chhao hmô theipa achâ.

Biehrai cha chhochhilina châbu ngâchhihpa a châ tahpa eima pahnopa vâta eima ngiapâna tha a patlôsa viapa a châ. Zehôva Khazohpa chata hlâno daihti nota a bietaihpazy pi a vaw patlohsa hawpa vâta aleilô zydua peirâh/paradi ta â vaw lie aw tahpa bietaih chhao a vaw tloh aw tahpa eima ngiapâ thei. (Maluh Reina 23:19) Chatatly, ‘Khazohpa haihpa bie a reih thei leipa chata khizaw y hlâta bie a taihpa chhâzaw hrona hnabeiseihna’ eima hnei.—Titu 1:1-3.

He châpaw liata eima reipahmaoh hawpa thâtihzy heta Biehrai cha a y patlua ngaitapa châbu châ ta, Khazohpa tawhtapa a châna a pasia. Anodeikuacha hmia-hnôh araohna, a sohsâhna, khizaw thâtih liata ado pakina, a phahnaizie nata hmâ tlâhpa a chânazie zy, chhochhilipa ngâchhihpazy dei châ vei. Apôstôl Pawla ta he hawhta a vaw roh: “Khazohpa bie he hroh ta, hmotao thei ta, zaozi koh nata hâh a taih raihripa hlâ chhaota tiah ta, hrona nata thlahpa, ru nata lathli pachhaih theina taihta chhô thei ta, pathipalôh liata pachâna nata a chhuahpazy he thlai a pahno thei.”—Hebrai 4:12.

Khazohpa ‘Bie’ eima reina chata eima hrozie maniah a panano thei. Sasyh a pasia awpata miah a phahnai thei hra. Khazohpa kyh eima pachâ na eima tah aw. Châhrasala Khazohpa Bie eima zyhnazie ta eima pathipalôh pachânazy, eima palôhphaoh, eima chhuahpazy a phuah aw.

Biehrai cha Khazohpa tawhtapa châbu a châ hmeihseih. Rei awpa, achu awpa, pasô awpa a châ. A chhôh biezy rei lymapata liahsa pachâ awpa a châ. Khazohpa lâsy piepa eima lyna eima palâhâh thei aw. Chatanachata chyhsazy châta Khazohpa â chhuahpazy na pahno paki via laih aw. Khazohpa a chhuahpa cha khâpa e, kheihta e pi a vaw tloh aw tahpa thâtihzy cha a vaw zi awpa châpaw liata eima reipahmaoh heih aw.

1.         Biehrai cha Khazohpa husothlupa châ ta, a do pakipa, ngâchhihpa a châ. (2 Timawthy 3:16)

2.         Khazohpa Bie chhôh liata thâtihzy he noh to hro châta a phahnai. (Isaih 48:17)

3.         Biehrai chhôh liatapa Khazohpa bietaih thokha cha pi a vaw tloh haw. (Maluh Reina 23:19)

Biehrai cha Zehôva Khazohpa Bie a châ

Ex. 20:1 “Khazohpa ta he bie zydua he chho ta.”

Isa. 7:7 “He hawhna heta Abeipa Zehôva ta a tah.”

Jer. 1:9 “Zehôva chata a ku vaw pazaw ta ei pakah hra ta; Zehôva chata ei hnohta, ‘Na pakah liata ei biezy ei soh haw.’”

John 14:10 “Nama hnohta he bie ei reipa he keima tao chhypata rei va na; Paw keima liata y ta, hmo tlao a tao tyh.” (See also John 8:28.)

Eph. 6:17 “Thlahpa zaozi Khazohpa bie cha la ula.”

Khazohpa hu sothlupa a châ, Chyhsa Py/Phu tawhtapa châ vei

2 Tim. 3:16, 17 “Khazohpa Châ bie to Khazohpa huso thlupa a châ hnokua cha, pachuna kyh liata zy, thailei pachâsana kyh liata zy, [chhoreina] kyh liata zy, siana pachuna kyh liata zy a phahnai hra. Khazohpa chyhsa cha raihria phapa to hria awpata a kipata a tobipata a paki thei nawpata.”

1 Thess. 2:13 “Cha vâna chata bâ leipata Khazohpa lâta alyna bie eima reih tyh hra, Khazohpa bie keimo tawhta nama theipa nama pyh nona khata, chyhsapa bie a pyhpa hawhta a pyh leipa ei chi ta, Khazohpa bie a pyhpa hawhta tlao nama pyhpa vâna khata, cha cha Khazohpa bie rai châ ta, namo angiapâtuhpazy hry liata a hria tyh hrapa cha a châ.”

Khazohpa thlahpa ta chyhsazy a parohsapa a châ

2 Pet. 1:20, 21 “Ano cha aleilô bôna y hlâta rao chhilipata y tlai ta, châhrasala daihti hnôh chaipa liana chata namo vâta aluahpata y ta. Ano vâta athipa hry tawhta apathyutuhpa nata a rôhnahna a pietuhpa Khazohpa angiapâtuhpazy châ ei chi ta, nama ngiapâna nata nama hnabeiseihna cha Khazohpa laita a y thei nawpata.”

2 Sam. 23:2 “Zehôva thlahpa chata keima hmâpata a reih:”

Hmotaopa 1:16 “Thlahpa pathaihpa ta Davi pakah ta Zisu patu tuhpazy a chhihthatuhpa Zuda kyh a rei chhilipa kha, Khazohpa châ bie kha a vaw tloh awpa raina a châ.”

Hmotaopa 3:21 “Cha taopathi awpa kyh cha Khazohpa ta hlâno daihti no tawhtapa a hrosohpa pathaihpazy pakah ta a reih hawpa kha.”

Chhochhilipazy heta Khazohpa tawhtapa a châzie a pasia

2 Pit. 1:21 “Bie chhochhilipa rai he, chyhsapa bie ta a puapa châ beih vei, chyhsazy ta thlahpa pathaihpa tuapata Khazohpa tawhtapa tlao ama reih tyh.”

Isa. 46:10 “Kei ta a chhâ awpa cha a thaona tawhta reih tyh na ta, hmo tao leipazy cha hlâno tawhta ei reih tyh.”

“You can live forever in paradise on earth” pages 47-56, “Knowledge that Leads to Everlasting Life” pages 12-22, “What does the Bible Really Teach? pages 18-26 and “Make sure” pages 45-53 publised by Jehovah’s Witnesses.

Comments

Add New Search RSS

nkcwlswe - nkcwlswe     | Your IP is:67.18.176.xxx | 2008-01-05 06:24:25 wkovgzmw yfbbpjqm http://bzhpmayl.com favmsdin rdqpalww wxonqafg Reply | Quote 0   1

Write comment
Name:
Email:	do not notifynotify
Website:
Title:
UBBCode:	-color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge
	Please input the anti-spam code that you can read in the image.

Powered by !JoomlaComment 3.12

Copyright (C) 2007 Alain Georgette / Copyright (C) 2006 Frantisek Hliva. All rights reserved.