Mara râh liata a pihpa, Mara reih a cheihpa Mara thyutlia hluhpi ta Mara Châ Roh dâh thai aru kaw ama tah tyh. Cha cha Mara Reih a cheihtyhpa châta lâ biedopa a châ tah va na.

Mara châ eima roh nata eima pâ tyhpa (eim roh chhei tyhpa) hawhrawh thokha a y. Cha cha eima my pathlei tyhpa châ thei ta, pahno lei a pachâpata a roh raruapazy chhao ama y hra.

Chi hropa hry liata pih ta, pho hropa hry liata laiseih ta, reihkhiapa (chi hropa reih) a cheih tyhpa, Mara râh atly beih leipa, Mara mozy nata apakyhna ryhpaohna a hnei leipa, Mara Reih pahlaopahlipata a cheih tyhpa,

A-AW-Y-B-CH chhao achu beih leipa keima hmâhta Mara Châ roh dâh he a ru, tah va na.

Mara Reih a cheihpazy ta Mara Reih he ao chhâhthôh ta papuapa a châ tahpa ama pahno chyu sai. “Ao Sâhpa” ne, “Ao Liahryhpa” ne, “Ao Hnaipa” ne ama châ. He ao chhâhthôhpa hry liata Ao Hnaipa liata “h” bai lymâpa a châ tahpa eima pahno khiahta cha roh nao kaw ta, rei a nao ngâsâ hra.

Mara Châ eima roh tita ao papua pâ laihpata rohpa a châ khiahtala a cha phahnai aw. Ao eima papua tyhpa hawh tlaita eima chapai (roh) tyhpa vâta a châ.

Mara Châ he eima reipa, eima cheipa hawh tlaita rohpa châ tlôh ta, roh a nao ngâsâ. Thokha ta Tlôsaih reih eima thai leipa vâta eima roh thai leipa na a châ ama tah tyh. Tlôsaih Reih eikha dei leipata cha thei beih va na.

Anodeikua Tlôsaih reih thai leipata Mara Châ roh dâh thai theipa a châ thlâh tahpa ei vaw pahno.

My chacheita lei awpazy cha:“h” he “Ao Hnaipa” ngiana a châ
“Kyh-pa-châ-na” tahpa he ao chhâhthôh a hneipa a châ. “Kyh” tahpa he “Ao hnaipa” châ ta, “pa-châ” tahpa he “ao liahryhpa châ ta, “na” tahpa he “Ao sâhpa” a châ. He “kyh-pa-châ-na” tahpa he ao papua pâpata na roh pachhi khiahtala, roh chhei thai leipa a châ tahpa na vaw pahno.

“y” cha “au” a châ
Tlôsaih reih ta “y” ao he Nochhi Mara mo hluh via ta “au” eima tah tyh.

“Kyh-pa-châ-na” cha “Kauh-pa-châ-na” a châ. Nochhi Marapa ta “au” ao a roh khoh khiahtala, “y” tahpata rohpa a châ.

“ie” cha pakah cha-ia pâpa a châ. Eima roh chhei tyhpa hawhrawh sâkha cha “ie” he a châ. “ie” tahpa he pakah cha-ia pâpata rohpa a châ.

“Ngia-chhie-na” tahpa bie he na roh tita, ao na papua pâ laih khiahta cha, “chhie” tahpa liana heta na pakah na cha-ia pâ thlyu aw.

Mara unawhzy Group liata Refugee a hmôpa thâtih eima paphao tyh nota, “aly a chhie kaw,” “aly a chhie hmeihseih” tahpa he eima hmô lyma tyh. “Aly â chhih” tahpa a châ.

Ao papua pâ laihpata na roh khiahtala “â chhih” tahpa nata “a chhie” tahpa roh dâh a nanozie pahnopasia theipa a châ.“ie” ne “i” ne “ih” ne a nanozie “ie” ne “i” ne “ih” ne he ao nano nanopa sai ama châ. “ih” cha “i” ao a puapa AO HNAIPA a châ. Ao papua pâpata “pa-hnei-chhi a chhih” tahpa he na roh pachhi teh. “Chhi” tahpa ao nata “chhie” tahpa ao ama nanozie na pahnopasia aw. Reih pachhi teh: “ngia-chhie-na”; “nô-chhie-pa”; “chi-chhih-pa”; chieh-lei-na”; “pa-hnei-chhi a-chhih-na”

“ie” nata “ei” a nanozie
“ie” tahpa cha pakah cha-ia pâpa a châ tahpa eima pahno haw. “ei” tahpa

cha pakah cha-iapa châ leipa ta pakah â pâpa a châ. Nochhi Mara Reih ta

cha a nanozie ahno tu âh vei.

“A-bei-pa” tahpa nata “bie” tahpa he a ao pakho pâpata na papua pachhi

khiahtala, “ei” nata “ie” a nanozie na pahnopasia thei aw.

Reih pachhi awpa: “tho-thei-pa”; “a-thieh-pa”; “chieh-lei-na”; “chei-na”

“ia” cha “e” châ ta, “iah” cha “eh” a châ
Notla Mara ta “ia” ao ama papua tyhpa he Nochhi Mara mo ta “e” tahpata a

ao eima papua tyh. “Lô-ia-pa” tahpa cha “Lô-e-pa” tahpa châ ta, “iakâh”

cha “ekâh” a châ. “Alôh a iah” tahpa cha “Alôh a eh” tahpa a châ. Nochhi

Mara reih ta “e” “eh” tahpa maih cha “ia” “iah” tahpata rohpa a châ.

“â” nata “a”
“â” tahpa cha pakah “â” pazy liata hmâpa châ ta “a” nata alyu vei. “a”

tahpa he “a” nata “ae” tahpata pho no ta papuapa a châ. “ngia-pâ-na” tahpa

bie liana heta “pâ” tahpa he pakah liahsa âpa châ ta, “na” tahpa deikua

cha pakah â âh leipa a châ. “cha-ta-na-cha-ta” tahpa he

“chae-ta-na-chae-ta (chæ-ta-na-chæ-ta)” tahpata ao papuapa a châ.

“Chatanachata” tahpa bie liana heta “a” he pho no ta ao papuapa a châ.

“chaphôhtuna” cha “chæ-phôh-tu-na” tahpa a châ. “ae” ao a puapa “a” phokha

he Mara Châ roh dâh chhâparohpa liata “h” ama baithlupa kha a châ.

“ô” nata “o”
“ô” nata “o” hmâ dâh he Nochhi Mara Reih tala a nano kaw.

Mara “ô” he English “o” a châ. “kho” (drum) nata “khô” (passover),

“mei-ôh”, “kha-zoh” tahpazy he a ao papua la a nanozie na pahno aw.

Mara Châ roh dâh â do via laih thei nawpa chabi sâkha cha châ eima roh

nota ao papua pâ laihpata roh awpa he a châ.

Mara reih a cheihtyhpa, Mara mozy hry liata a laiseihpa na châ khiahtala,

Mara Châ roh dâh a ru kaw tah khao kha. Roh thai awpa tlao tiama papua bâ

teh. Mara Thyutlia, Ahra Bâ teh! Mara Thyutlia Thyu Bâ teh! Mara Châ roh

dâh a ru tah khao kha. Yzie hnei ngâsâpata roh a chhuah kalâ (chyu) bâ ei

suh vy.

“Mara Reih A Thaipa Maih, Mara Châ A Thai” tahpa he eima motto sâkha a

châ.

Comments

Add New Search RSS

Write comment

Name: Email:   Website: Title: UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge     Please input the anti-spam code that you can read in the image.

Powered by !JoomlaComment 3.26

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."