Biehrai he châbu hropa zydua hlâta a y patlua via syulyupa châbu a châ. Biehrai he bu 66 ta pahlyhpa châ ta, chyhsa 40 tlu ta rohpa a châ. Arohtuhpapazy hry liata Abeizy, Mietakuvaihtuhpazy, Ngapatutuhpazy, Sawhkhâ rai a hriatuhpazy, theihthaipazy, Riahbeipa (General) zy, Dawhty zy ama hlao hra.

Biehrai a rohtuhpazy nata ama raihriazy thâtih a pahno khohpa hluhpi ama y. He hawhta:

Abeizy (Chhiepahrâhpazy): Biehrai a rohtuhpazy liata Abeizy ama hlao hra. Abei Davi nata Sawlawmaw zy thlai nâ vaw thei aw. (Hlazy 3na Bieluh; Biesoh 1:1; Biechhotuhpa 1:1) Isaih 38:10-20 liatapa HLA he Hezekiah rohpa a châ. (Isaih 38:9) Chyhsa sohpa hluhpi ta HLAZY 119na chhao he Hezakiah rohpa a châ tahpa ama pangiasa. Tawhla, BIESOH Bo 25na tawhta Bo 29na taih rohpahmaohna liata Hezekiah â hlao hra. (Biesoh 25:1) BIESOH Bo 31na he Abei Lemuel rohpa a châ. Chyhsa thokha ta Abei Lemuel he Hezekiah a châ tah ei ta, thokha ta Abei Sawlawmaw a châ ama tah.—Biesoh 31:1.

Mietakuvaihtuhpazy: Davi nata Amôsa zy he mietakuvaihtuhpazy ama châ. (1 Samuel 16:11-13; 17:15, 28, 34; Amôsa 1:1) AMÔSA CHÂBU he mietakuvaihtuhpa Amôsa rohpa a châ. Hlazy hry liata hla hluhpi he Davi phipazy ama châ. HLAZY bo 23na he Davi phipa châ ta, mietakuvaihtuhpa a châ tahpa â lâpasia.

Ngapatutuhpazy: Zisu pachupa ngapatutuhpazy hry liata Zawhana nata Pity zy ta Biehrai bu thokha ama roh hra. (Mathai 4:18-22) ZAWHANA ROHPA THÂTIHPHA ne, ZAWHANA CHÂ PAPHAOPA sâkhana, sânona, sâthôhna zy ne, BIEPHUAHLUAHPA ne tahpazy he ngapatutuhpa Zawhana rohpazy ama châ.

Sawhkhâ rai a hriatuhpazy: Daniel nata Nehemiah zy he Sawhkhâ rai a hriatuhpazy ama châ. (Nehemiah 1:1, 11; 2:1, 2; Daniel 1:19; 2:49; 6:1-3) Biehrai bu nopazy he ama moh chyu ta biepâpa ama châ.

Theihthaipazy: Biehrai a rohtuhpa hrosohpa pano he theihthaipazy ama châ hra. (Zeremiah 1:1; Ezekiel 1:1-3) Ezra chhao he Arawna pathla theihthaipa pakha châ ta, “Mawsi ryhpa a thai ngaitapa,” chârohtuhpa a châ.—Ezra 7:1-6, 10, 11.

Pheisaih beipa (General, Riahbeipa): Izarel mozy Bietaihpa Râh liata ama ngia nona khata Zawsua ta Izarel pheisaih sahlaozy a chhihthana heta Riahbeipa yzie a patlohsa. (Zawsua 1:1-3; 11:5, 6) Ano ta ZAWSUA CHÂBU he a rohpa a châ. Chyhsa thokha ta Davi chhao he Abei a vaw châ hlâta Riahbeipa a châ ama tah.—1 Samuel 19:8; 23:1-5.

Dawhty (Sibeipa): Kaolaosa 4:14 liata “Luka dawhty khoh ngaitapa” tahpata rohpa a châ. Luka heta ano moh ta biepa LUKA ROHPA THÂTIHPHA nata HMOTAOPAZY he a roh tahpa â lâpasia.

Reference: Watchtower (1991, March 15)

Comments

Add New Search RSS

Write comment

Name: Email:   Website: Title: UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge     Please input the anti-spam code that you can read in the image.

Powered by !JoomlaComment 3.26

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."