1. Anaona:

Khazohpa khokheina vata Malaysia nata Singapore liata a ypa Marasaw zydua eima  Beichaipa Zisu Krista Mohta ei chanao ei. Khazohpa nama raihria chakaona liata tha cha patlô mawh ei sy.

Eima hnôhla ta ei châ paphaopa liata rahhropa liata nama y no ta ei khokheina biezy roh na ta, atahma Khazohpa liata ngana pahnieh awpa aphana kyh ei vaw roh.

2. Bihrai rei awpa                      Hlazy 37:15

Hmoparaotuhpazy vata na pacha a parôh leipa la;

Moleina ataotuhpazy cha ua-va kha!

Sibiepa hawhta thlai chhawh pathlapata y aw ei ta,

Ahnalasi hrohpa hawhta thlai ama uah-aw.

ABeipa cha ngala, hmo pha tao teh; he rah liana heta y la,

 Ngachhihna zi lyma teh.

ABeipa chô liata a ly teh,

Chatanachata na palôh khonazy cha a cha pie aw.

Na yzie awpa cha ABeipa liata pahniehla;

Ano nga la, ano ta a tao aw.

Hlazy 118:8, 9

Chyhsapa ngapa hlata cha

ABEIPA liata ngana pahniehpa he a pha via.

Abei sawzy ngapa hlata cha

ABEIPA liata ngana pahnipa he a pha via.

3. Atahma chhôh Burma rah thatih:

Atahma hla chhôh eima Burma rah thatih heta Hlazy 37 na bie miah apatheisa ngasa kaw. Burma rah ryureituhpa General Khin Nyunt cha Secretary (I) achachhôhta biehnei ngasa ta, chyhsa to ama chiza ngasa.  Azachhihna cha pôh via lyma ta, azakô 2003 liata Prime Minister avaw cha haw.Pheisaih beipa a cha hlei khôta, ryureituh chaipa a chapa vata anobiehneina adyuhtuhpa hawhta ahmôpa zydua cha patupata lô-o liata akhô lyma. Mo hluhpi a thie hra. Ano dei cha leipata a lapinô chhao Burma rah chanô zydua chô liata biehneituhpa a vaw cha. Anodeikua cha October 18, 2004 nohta Gen. Khin Nyunt cha ano pheisaih lahpazy ta patu eita, o liata ama patah haw. Chyhsa hluhpi lô-o liata a khôhtuhpa cha, atanoh liata lô-o liata ama khô haw hra. Gen. Khin

Nyunt sawchapawpa Bagan cyber ahneituhpa nata apiahpa chhao patu ei

ta, ama raihriana zydua mo pakia nga chypa a cha. Gen Khin Nyunt nata azao khipa sôhpaliena kao nanopazy chhao chalihsapa chata, mo hluhpi ama patu haw, tahpa thatih eima dao hra.

Hlazy 37 he Abei Davi reithaina hla cha ta chyhsa siapa nata chyhsa sia leipazy duahmo a lyu leina kyh reina a cha. Chyhsa moleipazy tovyuh achhie awpa nata chyhsa sopazy (chyhsa siapazy) tovyuh phana kyh reina a cha. Abei David heta Israel rah liata kô 40 chhôh ryureituhpa a cha chhôhta hro avaw tyhpazy he Israel sahlao zy ama chu awpa ta avaw ropa a cha. Israel thokhazy chata hmoparaotuhpazy patyhpamana vata thata ama pacha a parôh. Thokhazy ta hmoparaopazy he vanoh atopa (byhna atopa) hawhta ama hmôpa vata amo cha ua-va eita, amo hawhta tao hra awpa ama khoh. Chyhsa thokhazy ta moleina ataotuhpa he thlai hriepata y leipa ei ta, byhna hluhpi ama topa ama hmô tita, ama no-ah ta, chyhsa phapazy hlata chyhsa chhiepa ama tahpazy heta byhna tlao ama to via he zaw, ama tah tyh.

Abei Davi ta, "Aw, namo Israel mo y, hmo moleina ataotuhpazy vata nama pacha a parôh leipa ula, thata a thôhna ama hmôpa vata ua-va hra kha u. Chahawhta ado lei ngaitapa ta athôhna ama hmôpa cha ahnalasi hrohpa a uahpa hawhta cha ta, thlai uah awta, chhawhpathlapa a cha aw. Namo deikua la, nama raihria chakaona liata ABeipa ngana chôta, ngachhih kawpata chakao ula, nama yna rah lia maih ta nama ngachhihna palasa lyma teh u. Byhna a awtuhpa cha ABeipa cha ta, ano chô liata tlao aly teh u, cha hawhta nama ly thei nawta, nama yzie awpa cha Abeipa liata pahnieh awpa a cha", a tah.

Hlazy 37 bie he eima reih pazao lymapa a cha khiah cha, Abei Davi testimony eima hmô aw. Moleipazy chôta he hawhta areih. Ado leipa ta hmo ahluhpi a hneipa cha bopi adaih aw vei. Chysa siapa achyhta ahneipa cha hmoparaopa a hluhpi hneipa hlata a pha via (tlah16)a tah.  Hrosohpa Zeremiah chhaota (Zeremiah  17:11 ), "adona kyh cha leipata a hnei rôhpazy cha, bykheih ano tih leipazy atlôpa hawhta cha ta; a hro no ta ano pathlua aw ei ta,a chhana lata cha ahrupa avaw cha aw",a tah hra.Davi ta reih pazao lyma ta, hmoparaopazy cha maniah dyuchei ta, thô awpa achhuah vei; chyhsa siapa deikua cha aria pha ta, dyu pacheisa leipata asaipa ta tlao a pie tyh ( 37:21),  Hawti vaw cha na ta,

atahma la ei vaw macha haw. Israel rah liata ryureihtuhpa ta ei cha chhôh zydua ta Khazohpata chyhsa siapa a pathlua tahpa vaw hmô beih vana; chyhsa siapa pathlapazy heta ku ama daopa hmô beih hra vana. Chyhsa ngiachhie tyh ei ta, ama sôhzy mohropa hnohta ama pahlie (pahmasa) tyh. Chyhsa siapa  pheichakana cha ABeipata a pa-ipa tyhpa vata a lapizy liata kha a ly tyh. Achapia hrasala, pao pathlah aw vei. Achha cha Khazohpa ta a ku ta kha a patu thlah ha pa vata a cha. He biezy heta Khazohpa bie liata y awpa thlahlôh achhih zie a palasa ngasapa a cha.

5. Khazohpa chôta apahniehpa liata hnabeiseihpa ado leipa:           

Marahpa sawzy ta Khazohpa liata ngana eima pahnieh nota, anotawhta eima ngiapana hnabeiseihpa he ado awpa a cha. Thokhazy ta, raihria leipata Khazohpa byhna to awpa eima khoh tyh. Chyhsa la tawhta taotheina rakha liata cha tiama papua awpa abyuh ta, anodeikua cha keimo ta tiama eima puapa cha Khazohpa leipa ta keimo eima tao thei khai tahna cha tiara vei. Khazohpa byhna (Vahneina) tahpa he chakeibarôh athi chiehpa hmôpa hawhta tlyma, ava tawhta taka (sôh) avaw tlapa tlyma, zunei kipha kawpa lyurah liata hmôpa hawhta tlyma cha vei. Raihriana liata tovyuh phana hmônazy, chô lata biehneituhpazy khokheinazy, hlao pakianazy, rai pakianazy, raihriana liata hnatla phanazy, hrialapazy nata aryh kawpata y theinazy, raihriana liata palôhpahahnazy, thapawh kawpata raihria theinazy he a cha. Chahawhpa kyhzy liata Khazohpa lata alyna bie reihthei awpa a byuh hra.

Khazohpa cha chyhsa to byhna pie awpa a khoh. Anodeikua cha byhna a pie thei nawpata, chyhsapa chata byhna piena lathlôh achhih awpa a cha. Chyhsapa raihriana chata Khazohpa byhna awpa lathloh a pahypa a cha. Azaona, tiamana nata hriapasana y leina liata Khazohpa byhna aluah thai vei. Cha hawhta tiamana liata chhao palôh azaw vaw lei awpa abyuh. Palôh azw vawna he Khazohpa ngaleina ngiana miakha a cha. Zami 1:6-8 liata "ahmotaopa liata a i leipa cha, Abeipa liata khahma hmô awpata a pangiasa kha se", a tah hra.

Khapa vata e, moleina ataotuhpazy nata adolei ngaitapa ataopazy he thlaochhih kawpa nata byhna ato kawpa hawhta  ala eita, a y molopa, chyhsa chôpa hmo pei ahria beihleipa nata ado ngaitapata ataopazy he byhna ato leipa hawhta ama y tly? He hawhta chyhsa moleipazy he byhna ama to thlah hapa a chakhiah cha, keima chhao khapa va e, ei sohsi nga hra aw?. Ei tao khohpa zydua taopa ta, amo hawhta moleina lathloh achhihpata athôna lathloh tlua awpa he pha thlah ha vei ma? Moleina taopata, achahrao chatôh laipazy, reih thei, chhoh theina vata maniah hmodah lapata, ama sôhzy ado leipata anieparutuhpa nata dovei ahmahpazy heta dyucheizy hnei leipa eita, ama chhohkha adôkha ngasapa hawhta y ei ta; chyhsa siapa ama tahpa chhôhkha nata moleina tao beih ngyu vei ama tahpa chhôhkhazy heta khapa vata e dyuchei thata ama hnei thlah haw tly?He biezy he na nohto raihriana liata na tyhpazy a cha aw. Kheih hawhpa lathloh e na chhih aw?, tahpa he nama khotlyna liata a y. Na khotlyna theila chhao na hria nga hra awpa a byuh.

Khazohpa nga teh tahpa he arei nao tata, ahmeiseihpa daihti liata aru kaw tyh. Kheihawhpa daihti liatama cha Abeipa angatuhpa zy he ahrupa hawhta ama hmô tyh. Chahrasala hru hmeihseih vei ei. Rahropa liata raihriapa ta nama y nota Abeipa ngana he kheihawhpa liata a cha aw? He hawhta ano chôta ngana pahniehna eima palasa awpa a cha aw.

Zawsua 1:9 liata, " Bie cha pie vana ma? Thatlô ngaitapa nata riahpha ngaitapata y teh; chi kha, riahchhiepata y hra kha, ABeipa na Khazohpa cha na siena maihta na hnohta a y lyma aw mah ta" a tah. Ahyma ta chi awpa abyuh vei. Ahy chô liata chhao hmopha leipa eima taopa cha hra vei. Ahy chhao rai mohnao awpa cha hra vei. Pasasatu awpa cha hra vei. Khazohpa liata chyhsa to atlahkha khai eita, ngaichhie kyhpachana deikua apôh lyma tyh.

2. Abeipa lata thlahchha lyma teh:

Zeremiah 33:3 liata, " Na awla ei cha chhy aw, hmô rohnahna nata hmo nyupa na pahno beihleipa ei cha hmô aw" tah ta, Zawhana 15:7 ta " Namo keima liata y thlah ha pata, ei bie namo liata a y thlah ha khiahla, nama khohpa maih hiah teh u, piepata nama y aw" a tah hra. Thlahchhana hro he Khazohpa eima ngana palasana nata ngiana a cha. Thla achha khao leipa hro cha aly thei tyh aw vei.

3.Na thôhna tuachaipa ta ABeipa palyupalih teh:

Khazohpa chôta ngana eima palasana cha raihriana theila hmiatua chaipa ta ano eima palyupalihna he a cha ( Biso 3:5-10).

4.Hro yzie ta Khazohpa za awpa:

Phillipi 1:27 liata Pawla ta, "Khaparai chasala, nama hro yzie cha Krista thatihpha nata a hmietua se" a tahpa hawhta eima hro yzie liata Khazohpa saw eima chana palasa lyma awpa a byuh aw.

Ngiapa leipazy hnohta pakah ta krizyhpa eima chana rei awpa hlata eima hro yzie nata raihria phana, tiamana ta Krista eih eima chana palasa awpa abyuh via.

5. Khazohpa ngana chôta raihria awpa:

Hlazy 127 liata "Abeipa angatuhpzy cha Zao tlah papie thei rima leipa hawhta ama cha aw.Tlahpizy chata Zerusalem kiahpa liata a ypa hawhta Khazohpa chata ano chyhsa zy hnohta kha a y tyh". Raihriana liata a I kawpata hrianazy, ngachhihna palasanazy he Khazohpa ypana palasana  acha.

Achha chaina ta Khazohpa achipa chhôhkha nata achi leipa chhôhkha liata hmo atlôpa kyh he ei rei khohpa a cha. Mongyuh rah liata Jonathan Edward chhôhkha he ama nôpaw chha tawhta Khazohpa a pahnopa nata sawzy Khazohpa lathloh liata achhihthapa cha ei ta, ama pathlahpazy cha aryla hawhta ama vaw hmôpa a cha. Amp pathlahpa zydua 875 cha ei ta, chazy hry ta:

Graduates                     : 155

College President         :   12

College pachutuhpa      :   85

Dawhtypa                     :  60

Pastor                          : 100

Pheisaih beipa               : 75

Chârotuhpa                  :  80

Lawyer (Dah athaipa)    :  00

Ryureihtuhpa                :  30

Sawkha Officer              :  80

Congress chyhsa          :    3

USA Senator                :    2

USA Vice President     :    1

Max Jude nata achhohkha he ahneirôh kawpa cha eita, a lapinô chhao USA liata a hneirôhpa sawchanô a cha. Anodeikua cha Khazohpa ngiapana bie raita a pacha beileipa, taka a y khiah ato eima tao thei, tahpa ta taka sôh angiapapa ama cha. Ano chipathlahpazy cha 1220 cha eita, he hawhta ama vaw cha.

Hawsai a pi nota athipa               : 300

Ku adaopa                                 : 310

Chieh leina vata apipasipa           : 440

Chanô apathaih leipa (azuahpa)  :   50

Phihmahpa                                :  60

Liany acheihpa                          :    7

Moleina taopa vata lô-o patahpa   :   53