Odoh Lah alahpa MSA memberzy on Chin National Day, Yangon

Odôh La

Khih kha liata chhâhmeih khy khai daihti, kô kha niekhi  ahneipa sahma abao thei awpa odyh cha satlia laihsazy ta a pahmaoh ei ta, zâ ta ama dôh tyh.  O hneituhpa ta sahma chhoh ta, zâkhidei hlasa ei ta ama lâh.  He he thyutliapazy châta hawsia, a kaoraohna pha ngaitapa a châ.  Atheihna nata ana-sana zy liata lâpa sawh-lâ, beilâ nata athihlâ zy leipa ta ahropa kheihhawhpa lâ rai lâ theipa a châ.  Satlia laihsazy hla aphina, hla aliena zy ama hmâh.  Pathipalôrupazy apahno rairina châ ta, a tlaichhaina zy hneipathaona a châ.

Zâ ta su kha liata apahmaoh ei ta, ama dôh awpa o la cha reihpathlie leipa ta ama pangai.  Tlyhmia ama tlô nata a raohkha kawpa ta:

Hyutuhpa ta,  “Ie zau va ee...” tah ta, Zawpi ta, “Ei pa la sahma”

Hyutuhpa ta, “Ie zau va ee...” tah ta,

Zawpi ta, “Va la la chachôh”

Hyutuhpa ta, “Ie zau va ee...” tah ta,

Zawpi ta, “Ahrei la sahma”

Hyutuhpa ta, “Ie zau va ee...” tah ta,

Zawpi ta, “A dei la rita”

Hyutuhpa ta,  “Ie zau va ee...” tah ta,

Zawpi ta, “Lyusie la pazau,” tahpa ta awh ei ta, cha khai nata ama zydua ta he hawhta hla ama sa:

“Azi nô chhi nâ hau la, hauh hauh la,

Sesi sa na ei cha dôh pi ee” tahpa ta sa ei ta, a chô liatapa hla ama sapa a ki khiah cha ochhi pahypa ei ta, satlia laihsa ta vâhviepata apatu ei ta, he hawhta hlasa laihna chôta ochhôh lâ ama ngiah.

“Ahlau ahlau zei ei si, ahlau patlai na ta, kiemei meipaw fai zau aw”

“Kiekauki, le kaukie salau kau kau” “Kaulau nô kaulakie kau sala kau kau” ama tah.


Odô za ta ama sapa hlazy cha:

1.         Chhelichhe

2.         Saitleipa

3.         Tharapupa

4.         Awhpivyhnô

5.         Vathleithla nô

6.         Saki cheihpa lâ

7.         Vao ie tlo ta lâ

8.         Awhkhypa lâ

9.         Zawchhauhele lâ

10.       Hlichhy Hly-âh lâ

11.       Hmekhu pati lâ zy he a cha.


Fâh E La ( Fa e La )

Marapa ta kô kha ta sachâpa tlyma, satôpa tlyma, a chheih a hrah ta ama hnei khiah cha abei, machâ, machhie pathlua leipa ta ia theipa a châ. ‘Ia’ tahpa he alyna thaphana dei châ leipa ta chicheipa sâhkô zy, a theipaw zy, pie theituhpa khazohpa (lyurahripa) hnohta a theina hlâna, palyupalihna, hmialâ châta byhna ahawna nata thâ thei nohlaina châta kyhchhipa a châ.

Nôpawzy reizi ta cha Sah-ia he Hawthai Marapa tawhta a thaopa châ ta, asu chhao he Chhihra khih(atahma Khabô khih kiapâh) liata ama pahrâ nota vaw tao tuachaipa a châ, ama tah.  Lôchei nata Hawthai râhri liata lyupih( râh) y ta, satô sachâh thata veih ta, sachâhpa he tu leipa ei ta, a hie ta ama hie.  Cha hawhta a hie ta ama hie thlâh ha tarawpa ta kô a vei ngaita kaw.  Cha tawhta saviah ta hie heih ei ta, ama kô a vei thlâh ha pyly hra.  Chavata hnôh lâta cha sachâhpa he sawh a hneipa hawhta pachâ ei ta, ama ia.  Cha lyupi cha ‘fâh-o râh’ ama tah.  Hawthai khih he Azei, Hrâphiah, Thâhaoh, chavahzy nata a hnia ta, nga thata a kiah.  Chavata ama pathao nota tlyhmia liata aphie phaw ei ta, pathao athaipa chapaw pano ta atyu hmahta khoh tô ei ta, he hawhta ama pathao:

“ (Vesi thaona fah-o râh le..., Li nga thaona Zeita hnaw le)6”

“Azie cha ma, Hrâpheh cha ma, fâh thaona…ee…manô sie râh ee…phe ma pazai te la ee)

“ Azie hnaw lâ, Hrâpheh hnawh lâ Thahaoh lâ,

Li nga tai sala ta tihnawh daih ee.”

“ Vesi ma a kaw tlô aw tah nei,

Kauh tlamaw nei, Mara hla chau ôh aw ee,”

“ Vesi sau khazie ma a châ tah kheh lâ,

Cheidô puchhi hraikhô suna tah maw ee,”tahpa ta hla sapa a châ.

Lâ dâh cha: pathaotuh penawh cha ama khoh chhaota a kaw duah ei ta, chanô chapaw a vialapata achaku ei ta, hla nata khoh patlapa ta ama chanei.  Ama hry tawhta chapaw pakha ta lâna chôta vaw pua ta chanô pano ta a hnôhlâ tawhta ama khia.  Atyu pathlah lei, adua pathlah lei a lalaopata ypa ta lâpa cha ta, a rairu ngaitapa a châ.  Ama tha a ba nata chyhsa hropazy (phu hropa) ta athlapa a châ.

Eima rah nata chipho chata,

C.Vakhaitha
Chairman
MSA

MSA nothla (pictures) on Chin National Day he liata mo theipa a cha.