Atahmâ chhâ he IT chhâ tah theipa châ ta, IT hmahsiena vâta khizaw chhao a vaw chhyh via lymâ haw. IT vâta khizaw râh hropa lâta hmo yzie zy, hmo a chhichâ ngâpazy thlai pahno theipa a châ ha ba. IT liata hmah a siepa cha chi chyhpa, khi chyhpa nata râh chyhpa châ hrasala, khizaw nata â patlâh theipa a châ.

IT tahpa cha Information Technology tahpa châ ta, Mara reih ta “Thâtih Pahnosana Khaw Raihria Thaina” tahpa ta palie ei sih la a bie yzie a ki via awpa ta ei pangiasa. IT liata khaw chi hluhpi a hlao ta, chazy hryta Computer he a lâpatlua viapa khaw a châ. Computer he a raihriazie a rôhnah kawpa vâta Mara reih ta “Khaw Rathli Chhaopa” tahpa ta chhopasia theipa a châ.

Chhâthieh Mara thyutliazy hryta Siku Sâhpa âchu theipa zydua ta Computer he a hmâh chhâ thai cheingei awpa achhuah khai awpa khokheina ei hnei. Châh nata daihti, su yzie phapa, duahmo phapa a hneipa thyutliazy cha Computer hmâ thai awpa dei châ leipa ta, a raihriazie pahno pâpa ta, Computer hmo pachiahpazy thlothlâ thai ta paraih thai awpa taih achhuah awpa a châ.

Chyhsa thokha cha Computerzy hnei thlâh taraw ei ta, Computer china (Computer phobia) ama hneipa vâta computer kyh liata kiathy thai tyh veih ei. Computer a chu tita palôh-rupa chhôh tawhta Computer phobia he pahlie tua awpa â byuh aw. Hria chakhyh kha, chhuh chakhyh kha, na parao pathlei aw na tahpa palôh phaoh lei awpa a châ. Cha leipa khiahtala Computer a hnei theipa chhaota hmâna kyh liata hmahsie thai aw veih ei.

Computer, Internet a hmâ thaipa, a hmâ theipazy ta IT a peimawhzie, a phahnaizie zy pahno thei via ei ta, Mara thyutliapazy chhao hmâ thai, hmâ thei achhuah chyu awpa a châ.

Marapa hryta IT lâchhâh ta rai a hriapa eima chyh kaw chy. Nochhi Marapazy hryta chhochhi cha!

IT thaina vâta rai pha viapazy hmô theipa châ aw ta, rai pha viapa eima hnei nahta eima khihsa chhao a pha via lymâ. Eima khihsa a pha via nahta eima chi nata pho châta raihria thei viapa a châ heih aw.

Mara thyutliapa Siku sâhpa patlô haw tlôh ta, a y pathâpa, a y chakhyhpazy chhao ama y hôlô. Siku-hawtipazy ta siku amâ chuna daihti chhôh tawhta châh nata daihti liahsa tlua thai, hmâ thaipa ta IT lâchhâh hmo kyhzy achu abyuh. Yzie phapa hnei taraw ta, hmah a la thai leipazy cha ngiachhie â chhih kaw aw. Thyutliapa yzie phapa a hneipazy ta Computer, Internet hmâ thai awpa dei châ leipa ta IT lâchhâh pahâh ta, IT raizy taih hria achhuah chyu awpa a châ.

IT lâchhâh raihriazy hria thei nawpa ta angiahpazy cha,

1)       Computer hmo pachiahpazy (hardware) kyh liahsa pahno ta, thlothlâ-paraih thai awpa,

2)       Computer Softwarezy hmâziezy thai awpa,

3)       Programming Language sâkha kha chhâ thai awpa

Computer liata hmâpa Operating System (OS) zy hryta, (1) MS windows (XP, Vista), (3) Apple/Unix, (3) Linux, (4) Solaris tahpazy y ta, Mara thyutliapazy ta MS Windows nata Linux OSzy chhâ hmâ thai achhuah chyu awpa, hmâ pachhi awpa âbyuh aw.

Computer a hneipazy ta Computer liata WindowXP/ Vista nata Ubuntu Linux 8.4/8.10 ta dualboot ta hmâ (run) pachhi u la, OS sâno ta pahno thei a chhuahpa a châ khiahtala a pha kaw aw. Dualboot a run khoh leipazy ta WindowXP/Vista liata MS Virtual PC 2007 intallpa ta Linux version sâkha kha run ta hmâ theipa a châ hra.

Application Softwares liata Desktop Publishing Softwares hryta MS Offices, Photoshop, PageMaker, AutoCAD hawhpazy, Audio/Video softwarezy hmâ thai a chhuah chyu awpa a châ.

Programing Languagezy hryta achu phapazy cha,

1)            C ++; C

2)            C#;

3)            VB.Net nata VB

4)            HTML

5)            PHP

6)            Java/JavaScript

7)            Python

8)            SQL

Programming languagezy he hluhpi y ta, ato achu khai thei awpa he a ru kaw. Chavâta, ei ropahmaohpa 8pa hryta sâkha kha he achu thei achhuah awpa a châ. He languagezy he Web lâchhâh tlyma, Database lâchhâh tlyma pahâhsapa feature sâkha kha ta thai patlua a chhuah awpa a châ.

IT he chhâzaw ta a y thlâh ha awpa hmo châ tlôh ta, Marapa thyutliazy IT hmozy hmâ thai, hria thai a chhuah chyu bâ awpa a châ. Marapa thyutliazy ta IT lâchhâh hmo a chu ama diathlapa he hmialâ daihti liata chi pho tlalana a vaw châ laih aw. Khizaw chi hro, pho hropa, khi hro, râh hropazy âpatlâh thei nawpa ta IT lâchhâh hmozy he tiama papuapa ta a laichadai bâ awpa a châ.