|
Lialaipi Awnanopa malu 77 zy Vailimapaw Thla O sana liahta |
|
|
|
|
Written by Sasa
|
|
Monday, 25 February 2008 |
Lialaipi khi Awnano sahlao, zydua ta malu 77 zy cha arino ( 23 Feb 2008) khata notla Mara Saikao khi lia vaw tlo eita Saikao khi liata padua haipa R.A Lorrain ( Vailimapaw) Thla O sakhei aw patah 28 Feb taita ama cha aw tapa Evan E Bi tawta thati sia kaw pata dao pa acha.
Lialaipi khisaw zy ta Vailimapaw Thla O padua ngala penaw sahlao zy chata tihah nata hmiakhuti chata tapa tah seitopa pokha nata Lialaipi local churches liata soh hnei chho pazy chhao ama vaw paphao hrapa tah thati dao pa acha. Atano Khazono he Saikao khi Awnano zy ta Vailimapaw Thla O sakhei awpa tah avaw tlotheipa Lialaipi Awnano zy hnota daiti zydua hla khai eitah my daw 9.00 am taw khata Khazopa bie nata hlata ahma pathao chaima patah zala daw 10.00 pm na taitah ABEIPA cha palyupali pata daiti rona kawpa ama hma thei tapa thati einaw chho hra ei. Myla taw khita Thla O sana liata rai ama hria pathao awh, atahma hawta phahnai kho kaw patah avaw pie pasai thei pa Awnano zy he eima thlachhana liata kha athei thla ha bei su vei, Notla Mara rah khi hlupi chhao myla hano he Thla O sakhei awpa heta ama vaw tlo leima awpa tah thati daopa acha hra.
Lialaipi Khi nopaw zy vyu patah Pupa Khako, Pupa Khawle, Pupa Ngozepaw,Pupa Mei-U paw zy vawtlo eita, Lialaipi Awnano Nopaw pazy vyu patah Lialaipi Biatupa Pastor V. Ve U, Lialaipi khi Awnano Hyutupa Pupa Situ, Lialaipi KNP President Pino Ma Zai, Lialaipi KNP Sec Pino Ziheno, Asst Sec, Thechaino zy chhao phahnai kho kaw pata ama vaw tlo hra, Lilaipi KHP chhithatupa Pupa Hrelai nata Lialaipi KTP sahlao zy chhao Hlapy phakawpa chhaota ama vaw tlopa acha, Centenary khai taw he cha Mara rah pachai patah Lialaipi liata cha Chano ma hawpa he pahleipadia khai bah awpah tah ABEIPA ZISU moh rei patah Zawpi zydua hnota Khinopaw pazy ta liasa phuana ama hnei hawna tapa chhao avaw tlo theipa Khinopaw zy tah einaw chho hra ei, Lialaipi khi he Nochhi Mara rah liata cha khilaichaipa nata East Mara rah liata cha aboh chha kaw typa khi kha acha.
Pahno chiepa hawta Notla Mara rah vaw tlo pa he pheita nohlupi vawsi hnao tyhpa acha va heta Lialaipi lata 28 Feb nota apalie hy awpah Zawpi sahlao zy cha heta ama sina lathlo zy apa tla via leima thei nawpa chata thlachha bao bei su vei,R.A Lorrain Thla O he ko 2009 khita patlo thei awpa tah beiseipa acha, He R.A Lorrain Thla O he pipaw kawpa hawta athati daopa chata Thlachhana kha ( room) nata sacret room tapa natah zawpi ahmana supathaipa tapa zy tah taotia haipa chata Marasaw zy dua chata supathaipa natah Pilgrimage taoty nawpa su peimaw kawpa avawcha awpa hawtah pangiasa kawpa acha.
Sasa
YSMU
ARMENIA
|
