Suto liata aypa khochhiepa Maraunaw zydua sai u:
Pasai vei hra sila 2007 ko chhana December thlapa Marasaw zydua chata a lyna daihti pha kawpa a chapa hawta ngiachhie mothli tlana chhaota miah a vaw kho sai ha chy aw.
Mo hlupi eima pahno cheihpa hawta eima hnola hata lia tlaita tilaihpi liata hrona apahliepa Chin chysa 46 liata Marasaw mo (4) khizaw maniah a ma kho sai. Marasaw deita cha leipata khizaw kaoki Chin chysa zydua achalua pata mothli tlana noh a vaw cha haw.
Eima Mararah liata eima nopaw chaipa chhaikha zy Centenary ko 2007 tlo thei khao leipata 2006 liata khizaw maniah a ma kho sai. Aw! Khazia maw eima Marapa thatipha dao ko 2007 maniah nama tlo khei khao thla vei tly i, eima chapasai lei bao chala, a pei kawna! tahpata agiachhiena motile chhaota 2006 cha eima vaw kho sai.
Ko 2007-pa he eima Marapa chata byhna tlona ko chase, tahpata eima mokha kaw tarawpata Sybypi khi nata Pathietla khi lia zyta Marapa eima tyh bahleipata raro y ngaitapa thih-leina eima vaw tyh heih.
Atanoh chhao eima hupo khei kawpa Mawhta Chakahna cha Marapa cho liata maniah akhu thla haw.
Khizawpi sai tua ei si:
Byma rah khotalaina rachhithana phapa eima hmo thei naw’pata chysa athy-thy-pazy ta Byma rah khipi viapa zydua liata lapi achhipa chata, Byma pheisaita chysa hlupi kah saopa nata lo-o patah pata a so khai haw ei. Palo pasa ta hupo achhi kaw.
Year End report liata 2007 he US pheisai ama hrona ama pahlei hlu chai ko a cha. Chahawna hrachata, Iraq nata Afghan chysa zy reitia lei ama hrona a lei haw.
Ahno chai viapa liata nuclear riahtuhna chhaichhi ahneipa Pakistan rah rachhithana khotalaina hmeseihpa (full democracy) achhitha thei tuh awpata mokhapa Ms Bhutto's Pakistan People's Party cha Meithei ta kahsaopa tlao a cha.
Ko chhana ata noh tlaita democracy rah phapa padua achhuapa Africa Kenya rah liata rah chhitha tuh awpazy atlyna liata chysa hlupi hrona ama pahleipata thati eima dao heih.
Chysa hlupi eikhata thietheipa nuclear chhaichhi 2007 chho liata parao khai awpata bietaipa North Korean cha abietaihpa hawta tao hlei lei pata ko a chha ha aw.
He hmo zydua saipazie pata hmiala eima sie lai nawpa lathlo phaohri thlazo achhi ngasa. 2008 pa he khapama a lyuh va tly! Abeipa lia deita eima thlalohna eima pahnie heih aw. Eima beiseihna deikua pahlei kha ei si.
Ko 2007 chho liata eima hnakhoata theipa, eima mota hmopa, eima tyhpa runahna, tyhryna, pacharona, nata ngiachhiena zy hlupi y hrasala hmophapa eima hmopa, hlaotlohna byhna hlupi eima dao pylypa vata ABEIPA la alyna bie rei lei thei mapi.
Ko 2007-pa he Marasaw zy thaina sohna achuna liata eima hlaotloh chaina ko ta a vaw cha haw. Secular nata Theology doctorate hlupi pua pita, cha hleikhota achuna hrohropa liata hloatlohna eima to chaina ko a cha.
Eima zydua eima mokhapa Gospel Centenary Jubilee chhao aronah thei chaidah hawta patlo theipa a cha. Mararah chho liata Saikao, Siaha, nata Sabypi zy liata ronah kawpata patlohpa a chapa hawta, Yangon, Kuala Lumpur, USA nata suhto liata aly kawpa nata ronah kawpata a hma thei khaipa a chapa vata Marapa ta Abeipa khokheina byhna eima to talei thei mapi.
Atako he Marasaw Music VCD eima papua hluchaina ko a cha. Choir, Gospel nata chi hropa VCD hlupi a pua. He zy heta Marapa chi nata pho, Mara cha khasia pata a chalua papua via rili.
Nochhi nata Notla Marapa apokhana lapi eima pakaw chaina ko a cha hra. He taw chhao eima chhohia thaina hma a sie pha via lyma awpata eima beiseih.
Marasaw rahpha viapa eima pha thei chaina ko a chapa hawta centenary Byhna ronah kawpa sakha a chapa Mara Social Welfare and Development Committee (MSWDC) chhao a vaw dua thei haw. Ato kyh liata Marasaw zydua sypahmao pata maniah adua khei thei lymapa phupy achapa hawta Marasaw alai achy eima ly khei chaipa hmo sakha a cha.
Kaokha lata pacharo machhie sapata vaw y hra sila, ABEIPA ta he tlu pota akyh pachapa Marasaw hnota byhna maniah a piepa he reipatie pata alyna bie eima rei ngathla awpa a pha. Abeipa lata alyna bie rei daihthla kha ei si.
Chahawnahrachata, Mara awnanopa nopaw zydua Marapa chata thlachha nama vaw tiama via heih bei awpata ei cha nao ei. Mara thyutlia zydua thaina sona achuna liata nata raihria liata tiama papua via ei si. He hawta 2007 ko chho hlaotlohna byhna eima to phapa he nama zydua akaoroana, thlachha tiamana, nata raihria tiamana zy va deita a cha.
Khapa rai chasala chysa ta eima taotheipa hmo a chyta kaw. ABEIPA ta akyhpachapa Marasaw zydua chata 2008 pa he hlaotlohna nata alyna byhna hnawta pachasa bei maw sy tahpa deita he eima beiseihna chaipa a cha.
Happy New Year 2008!
Satlia Elaisa Vahnie
Founder and Administrator
Maraunawzy & MITCS
December 31, 2007
|
