|
KHAZOH KUZÔ MARÂLAND Vanoh paw
“Chi lai viapa nata hneirô viapa, Mawpa tlyma, Liahpa tlyma, Viahpa tlyma, Kaohpa tlyma, Japan-pa tlyma, Mongyuhpa tlyma, kheihhawhpa chi laipa tlyma ta vaw pi thlah ha leipa nata” tahpa ta chi chyhpa nata râh sipasapa Marâpa na châpa pei tahna nata na châna liata a ly thei leina daihti na za hnei ngai ma? Na hneipa chhaota cha maochhie va na. He article na rei khai tawhta deikua cha chahawhta sasyh a mohnaona nata a ly leina cha vaw hnei khao khah y!
Khizaw râh nanopa râh 6 liata za pahrâ hapa ta, râh hropa hluhpi chhao za tly ha na ta, eima Marâland tlai he vâpa ta tlô heih awpa a ngiahtiah leina khâ ei hnei ngâ thlah ha tyh cha maw! Marâland kyh ei rei hoh tu vata ei sawchapawpa Vanoh nata eima nô Vanoh nô ta “Marâland Pâpâ” (Marâland Daddy) tahpa ta eina aw pâ ngâ kaw tyh ei. Chahawhta eina aw ti ei ta, a pasasa leipa nata ei hmia tlao a kai kaw tyh. Khizaw su to liata a ypa Marâpasaw hropazy chhao keima hawhta eima râh nama vâ kaw tyh hra nata ei pangiasa. Cha tlai, eima râh he Khazoh hmosaipiepa, tlaichhaih tlâhpa nata vâ tlâh a châpa râh na a vaw châ ha tlai!
Ryhpachaneina bo 2, châh 4-9-na nata châh 19-nazy liata Khazohpa ta, Israel sawzy hnota hehawhta a rei: Edôma (Esaw) râh, Môaba râh nata Amawna râh zy he keima Khazohpa ta he chizy hnohta ei piepa ei râhzy a châ hrapa vata, nâmo Israel sawzy ta he râhzy he nama la tiah-rah awpa châ vei, tahpa ta. Chahawhna hra chata, Marâ râh, Marâhpa chi, nata Marâ reih zy he Mongyuh reih ta “by chance” ama tahpa ta a vaw y thlah hapa châ leipa ta, Khazoh chhâzaw hmochhuahpa chhôh liata a tlôh hrapa châ ta, Marâland he Marâpasawzy pahrâ nawpa ta Khazohpa Ano tlai ta maniah a piepa râh tlai cha a châ hra. Chavata eima râh, chi nata reih pabohsa ta palaiseihsa awpa he pikhei maophaona lai ngaitapa a châ. Krizyhpazy châ chhochhi ta cha Khazohpa ta maohphaona maniah a piepa hawhta eima pachâ awpa a châ. He hawhta ei reipa heta chi hropa nata râh hropa chyhsa eima pathlua awpa nata eimâ hao awpa hawhta ei reina châ tiah-râh vei. Eima Marâ châna liata sia awpa ei reina tlao a châ hri. Eima Marâ châna liata liahsa ta eima sia ha tua leipa ta cha chi hropa zy pitloh kawna nata pahno thai kawna chôta a pakyh (relate)-pa ta a pyh (accept) thei aw mapi. Eima chi châna liata liahsa eima sia ha tita deikua chi hropazy chhao kyhpachâna dopa ta kyh pachâ thei aw pi ta, missionary chhao taihta chi hropazy lâ cha eima sie thei aw.
Lôhkha phao ta zâ charei khoh tyhpa Marâhpasawzy nata Marâland cha Monyuhpa (British), Viahpa (Indian) nata Kaohpa (Burmese) zy ta râh no lâta maniah ama za pachhaih haw. A hmiatua ta Mongyuhpa ta District sâ thôh (Lushai, Chin, Arakan) zy liata maniah rairuah tua ta, India nata Burma khotalaina ama hmô nota râh no lâta international boundary ta maniah a pachhaih haw. Kha daihti nona kha, chahawhta Marâpasaw zydua nata Marland pôhpalôhpa châta mâsana nata pachâna (vision) zâ hnei paphapa Marâ nôpawzy za y hluh leipa ei ta, ama za ypa chhaota reih nata kah ama za thai lei vata chahawhta zâ reipasia thei hra aw vei ei. Chatanachata Mongyuhpa, Viahpa nata Kaohpa zy cha ta, nô kha paw kha saw Marâpasawzy pi cha maniah ama za pachhaih haw. Hehawhta Marâpasawzy chô liata pei lai ngaitapa ama za hria hapa he pei tahna dikha chhao a hnei leipa ama lyu thlah ha. Khazohpa kuzo ngiapa ama parao hapa châ ta a pei ngaita kaw.
He hawhta Marâland nata Marâpasaw pachhaih pazaohpa ta eima y hapa he atanoh thyutlia daihti liata kheih hawhta pachâ (respond) awpa ma a châ aw? A tlia liata “Na chiheihzy mohnaopa ta na my tlamaw aw ei” tahpa article liata ei vaw ro hapa hawhna khata, India nata Burma sawhkha ta a pasaina dâh chhôh liata Nochhi nata Notla Marâpasaw zy pi a kaona nata a zaona pha viapa eima hnei via lyma awpa a peimawh. Keimo nata keimo ta eimâ pasô lei khaita cha ahy ta maniah vaw pasô aw vei. Achuna lâ chhâhta thata eima tiama awpa peimawh ta, thaina sona ta eima râh he eima padua awpa a châ. Nochhi Marâland motor tlô thei mâh leipa ta, he he atanoh Nochhi nata Notla Marâpa thyutliazy, politician-zy nata awnanopa chhituhpazy ta kheih hawhta a taona dâh lathlôh zy patuapalua ta hria pâ awpa a daihti liahsa a tlô habapa ta â lâ. Lâthlôh (communication) a y leipa nata a pha leipa khiata cha hmahsiena y thei hmeihseih vei.
Marâ reih he keimo Marâpasawzy ta eima chei lei khiata cha ahy ta maniah vaw cheipa leipa aw ta, chavata a leina lâ a pangai lai lyma aw. Marâ moh chhao he keimo Marâpasawzy ta eimâ bi lei khiata cha ahyta maniah a vaw bipa aw veih ei. Marâh moh he Mawnah moh Thanga/Thangi tahpa tlyma Kaoh nawh Maung Win/May Win tahpa tlyma ta chanô chapaw ama panano thlah hapa hawhta châ leipa ta, chanô-chapaw moh yzie (concept) a hnei khai hapa châ ta, eima moh chyhsa ta maniah ama awpa nata Marâpa eima châna cha thlai â lâ pâ thlah hapa a châ. Hlihchhy cha chanô moh châ thai beih leipa aw ta, Hly-âh chhao chapaw moh châ thai beih hra aw vei. Chavata Marâ reih cheipa nata Marâ moh a bipa pasô via lyma ei suh u.
Khazohpa a hlao leipa ta râh kyhpachâna deikua lâkô daih aw vei. Beipa a tlypa râh eima châpa hawhta, Khazohpa sawzy hro nata âhmiepa ta eima hro awpa a châ. Avyuparuna, a phei alana nata ahropa moleinazy liata a ngia leipa ta; thathi leipa ta, Beipa china chôta ngachhi ngaiatapa nata tiama ngaitapa ta hriapasapa ta a chu chyu aw pi ta, rei khao aw vei; eima kyhpachâpa Marâland he a khaih patoh bâ aw.
He reipa hla (poem) ei phipa heta vaw pachhâsa heih chy sa la:
BIETAI RÂH
Chasipaw zâ nohtla pha lia, Raihnô khaih pha tlâhpadâ tawh; Marâ tlâh ngiazy sai sualua na! Zâlâ thlihua nai zualua hry, Sopavawnô ao ngia chai zy; Lytlâh lôkâh tisao pasoh nah Lyurâh pawpi, paw sôh kô zy; Khiahlôh a vaw tlâh rima cha! Marâpa chi, heihzy saih u, A khy u la, sai hra tua u! Nochhi tlâhpi, notla tlâhthlôh, Maw tlâh sâh nah chho lytlâh byuh;
He tlâhzy, he tlâhzy tlai hi,
Keimo châ Khazoh kuzô ki, Byhnâ tlâhzy a vaw châ tlai he! Marâ tlâhpi, ei paw tlâh ngia, Ei cha pasô ngaita kaw dia! Noh ry molâh râh hro zy hry, Nawhhnai va chi, hy ei laihna râh! Hy, Marâpasaw, sahrôsizy, A ly u la, a ly teh u ! Rei khao aw vei, bietai râh lia, Marâsawzy lôhhrâ tlô ta Charei zaolao n’awpa daihti pha. Cha nohzy lia, Marâh tlâhpi, tlâh sâhzy ta Ngôh vyh ti kaw pali aw ei;
Râh panyu pha ramawhzy ta
Tâkâ thei kaw pathei aw ei; Vahtly tipi, chho Beinô ta Ngôh suasuapa vaw patoh aw; Tikhaohpi ti, Palâ tipo ta Rubi lôsôh kaw papho aw; Liah-ryh by pha, Marâ by zy ta Kô vei chhiah vei maih pazao aw ei;
Marâ thyutlai, soh chai zy ta
Thaina chi to vaw phaoh aw ei ; Marâ râh ngia, khih to liata Bei reithaina khâ pathâh aw; Chatlu pha awpa rima cha!
|
