|
SINGAPORE & MALAYSIA LA SIENA
REPORT
Revd. NC.Vabeilua
Biehmiapa :
Khazohpa hmo paryhzie noâh a chhih kaw. Ei pacha leipa nata ei raorâ leipa ta X-ray chalei nawpa ta Mara Christian Fellowship, Malaysia zy hnohta ama theina rakha deichhyna rai hria hra awpa ta khokheina pahnosa awpa ta Laihsa N.Dawhniarili, KNP Secretary nata sie awpa ta KNP fund raising Committee ta miah a tuah. Laihsa Beinônai Phiapi nata Laihsa S. Lalmuanpuii chhao chakaona miahkha hawhta pachâpa ta âmo sôh hryuhpa ta ama vaw sie Date 28th March 2007 nohta Siaha puasai pi ta, Date 27th April 2007 nohta Siaha eima vaw tlô heih.
Visa New Delhi liata pataosa a byuhpa vata Guwahati tawhta Delhi lâ cha Train ta eima sie.Student o atlôhpazy hnohta tlô pita miah ama dao ngâsâ sai. Abeipa mohta ama zydua hnohta alyna bie a thata eima reih. Good Friday chhao Marapa saw eima pahnosa theina rakha a pahnosa pita o liata Programme eima hmâh thei hra. Su hlapi tawhta âvypazy ama châpa vâta, zalâ niepahmaohna chhao eima chhuahnoh hra. Satlia L.Beimopha I.R.S Faridabah liata aypa chhao maniah avaw hlao thei ta eima ly ngasa. Eima zydua ta cha sythôh rahchhôh eima châpa ta eima pahno. Visa thlai eima hmô thei leipa vata Delhi liata noh 9 châh pi ta, he chhôh ta Fetehpur Sikri zy, Agra Fort zy, Taj Mahal zy moh pi ta a rôhnah eima tah kaw sai. Delhi a paloh kawpa vâta Himachal Pradesh khihpipa Shimla lâ chhao pyu kaw tly pita, Shimla cha a chakua ngasa. Shimla he tlâhrâh châta Aizawl hlâ chhao a chyh viapa ta ei pahno. Anodeikua a ziza pha ta, a râh he taochhyhpa lyu ta â ngia ngaita. Shimla khihpi he Pakistan Prime Minister, Z.A Bhulto nata India Prime Minister, Indhira Gandhi agreement ama signed su châta, discussion ama hneituachaina o nata, agreement ama signed na o cheingei chhao eima tly hra. Himachal Pradesh he cha dahhaw a thata atla tyhna su nata a rah he â ngiapa vâta mo awpa ta chyhsa hluhpi kô tota ama tly tyh. Shimla liata nohkha châh pita, satlia K.Robert S/o Macha K.Beisa, Siaha ta miah buakhei ta eimâ ly ngasa.
Singapore tlyna :
Nôpawzy khokheina nata ryhraona hawhta Singapore tly tua awpa eimâ chhuah. Singapore tly pasaina (Visa) cha Delhi liata hmô thei ha pita, Malaysia tly pasaina (Visa) deikua Singapore liata hia chhyh awpa ta dt 13th 04.07 pata Delhi tawhta Indian Airlines ta Singapore eima pangai. Zawhtheina eima kiapa he lai tu leipa ta Delhi tawhta Singapore cha dawh charu chhôh eimâ zaw. Laihsa Nônai deikua Singapore Visa a hmô thei leipa vata Delhi tawhta direct ta Malaysia lâ â vy. Singapore cha my râh ta vaw tlô pita, Airport (Changi Airport) liata laihsa Merry ta miah vaw dy ta eima ly ngasa. Laihsa Merry he Singapore liata kô 7 a vaw y chiehpa châta, kyh to liata miah buakhei chaituhpa a châ. Chinese reih zy, English reih zy, Rakhine reih zy, Khumi reih zy a thai ngâsâ sai. Eima sie hlâ tawhta eima contact chaipa châta, eima tlôkiana nata niedona kyh totie liata eima pabua pabâ chaipa, a daihti nata a hneina sôh taihta eima pahryuh chaipa a châ. Singapore liana heta Marapa saw sypali hlei ama y. Mara Christian Fellowship a padua ei ta, M.C.F heta Singapore liata eima châh chhôh tlô mâ nie ma, a khiehkhana liata eima hryuhna zydua maniah ama tôhpa ta pahno pi ta eimâ ly ngâsâ. Singapore khihpi liata su mohpathapa hluhpi maniah ama mokhei. Eimâ ly ngaita. Sentosa Island resort zydua eima tly khai. Rope way, Under water world, songs of the sea etc zy tly pi ta, eimâ ly ngaita. Singapore liata Marapa saw uhthei viapa a ypazy cha Satlia Saihmô nata Laihsa Maimai,satlia Rane nata Fietanô zy, amo bao no he Centenary pakhô leipa ta chhôhkha padua âchhuahpa zy ama châ. Singapore khihpi miakha he Independent sawhkhâ sâkha a châ. Ama râh heta khâpa hmah papuapa hnei vei. Ti dâhdei chhao he Malaysia tawhta ama chaleipa a châ. Chahrasala atanoh cha Asia râh chhôh liata “râh hmahsie chaipa” tah theipa a châ. Ama râh luhpazy lathli he arâh zawpi ta ama niepa a châ. Râh châta hria tlai ei ta, Chavâta Independent ama hmô nota sawhkhâna atopa party ta atanoh taihta a sawhkhâna ryureina patu ei ta, opposition party member cha ama chyh via lymâpa ta ama reih.
Singapore khih Thâtih :
Singapore khih Thâtih eima reih khiah ‘ a pathaih zie ‘ he reih lei theipa châ vei. Ama khih liah zy, ama olyu zy, ama Bus nata Train zy, Restaurant nata achyhsa rai rai ta ama pathaih ngâsâ sai. Zawpi pua pakhyna su (public place) liata chhao a puapa hmô awpa y vei.
Electricity ama hnei phazie cha, Current a thi tyh tahpa pahno veih ei. A râh he palo kaw ta anodeikua electricity ama hnei phapa vâta O zy, Train zy, Bus zy, Taxi zy, restaurant zy, Office zy etc air conditioned ta taopa sai a châ. Khih liah deita he air condition leipa a châ. Taxi driver hawtihpâpa hmô awpa y veih ei. Pitlohpa sai tlai ama châ. Ama taxi he Satellite pazao khaipa châta, chyhsa moleipa zy ta hrao a chhuah ei sala, ama headquarter Office tawhta satellite liata a hraotuhpa zy, ama hraona su nata chhaichhi ama hmâpa chhao thlai pahno thei lymâpa a châ.
Dated 15th 04,.07 (Abeipa noh) ta Chin Christian Fellowship liata biereina daihti na pie hra ei ta ei ly ngâsâ. Mission Day achâpa vâta Rahzohpa ECM ta a chakaona tlâhpipa report chhao ei reih pâ hra. Ei palôhrupa ta ECM Pastor hry liata Singapore liata Sermon a reih tuachaipa ei châ thlyu aw tahpa ei pachâ. Maniah ama daodo ngâsa. Mara Christian Fellowship chhao Pastor ama hnei leipa vâta ano eih ta a duah thaipa châ leipa ta, Chin Christian Fellowship liata tovyuh peimawhpazy topa ta hmaohkha ta amâ pakhy tyh hra.
Singapore liata eima programme awpa eima pachâ awpa nota deikua, ahmaoh nawpa su vaw hnei mapi. Singapore liata cha khodah hawhta o tlôh thaipa châ vei. Ama puhpa (boss) zy hnohta ama y awpa a châ. Sawhkhâ ry liata a hriapa ama châpa chhao ta, hostel liata ama y awpa a châ. Mopakha pano ta o tlô pasaipa châ vei. Chavâta eimô hmô pakhy nawpa su a y leipa vâta Hleidy (flyover) ry liata thlahchhânazy hneipa ta eima programme awpazy cha eima pachâpahmaoh. He no deikua, “Pavaw zy ta bu hnei ei ta, Sihâ zy ta khaoh hnei eita, chyhsa sawchapawpa deikua aluh nyu nawpa hnei vei”. tahpa ei palôh liata â vaw lâ kaw.
Malaysia lâ siena :
Singapore liata Malaysia Visa hiah heih pita 18th 04.07 zâlâ ta Visa cha la thei pita, he zâ dawh 11:30 pata Malaysia khihpipa Kuala Lumpur lâ cha Bus ta eima sie. Mydi dawh 4:30 pata Kuala Lumpur cha eima za tlô. Eima zatlô awpa miah vaw mokhâh ei ta, Revd. John Vahei Byhna nata Mara Christian Fellowship chhihtatuhpazy ta Bus station liata miah vaw dy ei ta eimâ ly ngaita. Thopi zy doh pita, eima tlô nawpa Budget Inn Hotel lâ ngai pita, buakha pha tlai eima hmô hmâ.. Laihsa Nônai chhao keimo hlâta vaw tlô tuata atlahpata hmia hmô heih pita, eimâ ly kaw.
Kuala Lumpur liata chakaona :
Malaysia liata Marâpa saw 600-700 likawh ama ypa ta amâ pahno. Work permit hneipa tlai ta a ypa chhao ama y bâ hôlô. A hluhvia syulyu deikua sawhkha pasaina hnei leipa ta a ypa ama châ. Khi kha tlyma, khi no khi thôh pahlypazy ta o tlôh ei ta, o kha liata 30-60 ama y via chai. Marâpa o tlôna zydua tly khai awpa khoh kaw pita, anodeikua daihti ryhpaohpa a y thei leipa vâta tlykhai thei ma pi.Eima tly thei tlakaihpazy cha :
1) Sabypi mo o tlôpa
2) Lialaipi mo o tlôpa
3) Hraihpi mo o tlôpa
4) Ngiaphiapi mo o tlôpa
5) Lôcheipi mo o tlôpa
6) Aru mo o tlôpazy he a châ (thokha he cha khi 2 khi 3 â pahlypa ama châ)
Eima tlypa maih heta pati nie miah awpâ lyma ei ta, beichho thai ei ta, ei nawhta ei chhipe’nawh Muanpuii nata Nônai ta cha “Atazâ tapa he a pahâh chai” ama tah laih ngâthlâh ha. O to liata chhôhkha apakhyna hawhta hneikhei laih pita, eimâ zu chhâpa chhao eima palâhâh laih hra. Thlachhâna eima hneina maih ta lyma (hmosai piepa) miah pie lymâ ei ta, a zydua ta X-ray chaleina châta eima soh khai. Raihria a hneipa sai ama châpa vâta noh-ykha Programme hnei thaipa a châ leipa vâta olâ ta â ryhpaohna hawhta chakaona he maniah ama patohpatiakheipa a châ. Date 21st.04.07 (pachyhnoh) deikua Mara Christian Fellowship O.B nata Executive Member zydua, Krizyhpa Nô Py chhihthatuhpa zydua nata â mâ theipa maih Achhyna o liata apakyhna Programme taopa châta, zâlaâ daihti liata Khazohpa bie cheingei leipa chhao reipahmaohna daihti hneipa châta eima ly ngaita. He noh he Mara Christian Fellowship ta kyhchhina miah â chhuahnohpa. Kentucky Fried Chicken (KFC) ta kyhchhi pita, lao la amoh dâhdei a y. America Awhsa chateipa eima nie thlâh hapa cha my a ru kaw thlyu aw. Restaurant liata awhsa eima niepa cha thlôh khai hata a pasie awpa hawhta pasie thei khao vei. Marapa o liata keimo lâ chho dâh ta ama chhopa, hmiahkhu liahsa thlapa, dâhpithu chhao ta eima nie thlâh hapa cha, “ byurei miahthôh tu sihla”, tah awpa a nao ta !
Date 22.04.07 (Abeipanoh) ta Mara Christian Fellowship pakhyna (Service) Achhyna o liata hnei pita, achhyna o ta miah â tlôh leipa vata, thokha cha khôtho liata eima bah hlâlei miah ama hâ. A hluh via syulyu he Myanmar tawhta âvypa châ ei ta, India tawhta âzupa chhao eima hmô bâ hra. Sôh thyu nawpa châbyh rai chhielie khai ha pita, he apakyhna liata ama vaw cheih. Eima hnabeiseihpa hlâta hluh via chakaona rai ama hriapa ta eima pahnopa vâta eima ly ngaita.
Malaysia liata Marapazy duahmo :
Ei hmôna zie ta foreign liata y awpa ama khohpa vâ tlai ta a siepa ama ypa ta pahno vana. Ama râh sawhkhâ a pha ngâsâ leipa vâta pasai leina chôta o nata lyu, chhôhkha nata khih puasaipa ta thi thlâh ha châpa hlâta cha tah ta mothlih nata palôh keichheihpa ta foreign lâ a pangaipa sairô ama châ. Singapore nata Malaysia lâ hlawhfah ta sie awpa hlâta cha India Mara râh liata nohkha Rs. 100/- hlaopa ta raihria awpa cha ama khoh via awpa a châ. Chahrasala ama marâ heihzy hlâta Malaysia mozy ta ama dao via hapa vâta a châ thlyu aw. Mara râsh hlâta Malaysia amâ tlyh via thlâh ha cha ! Chhôhkha ta a ypa y ei ta, saw lahpi achhi leipa ta kô thôh kô palih ay hapa y ei ta, thokha cha satlia laihsa ama châ. Ano leipa lâta na pachâ leipa ei sala, sawhkhâ nata chhôhkha duasu ta â chu khao leipa vâta a ypa ama châ chai. Malaysia râh he Muslim râh châ hra sala, Marapa sawzy chô liata vaw pha chho ei ta, amâ phuhpa rai vaw pahriasa ei ta, nie amâ hmôpa dei châ leipa ta, ama sanawh chhôhkha baona nata mopathaihpa chakaona deichhyna liata chhao pahnai amâ vaw ngiah ngâsâ.
Raihriana daihti he atlâhpipa ta dawh 24 chhôh a châ. Chhô nata zâ ta pachhaihpa châta. Dawh 12 chhôh he mo pakha ta ama hriana daihti chhôh a châ chai.Chavâta chhôhkha apakhyna eima hneina liata chhao aki khai thai veih ei. Zâ dawh 11:00 pata apakhy eima bâh nota chhao raihriana tawhta avaw di mâh leipa ama y thlâh ha tyh. Ama vaw hriapasa kaw. Keimo Office liata dawh 8 chhôh a tyuh thlâh ha awpa hmah ta aru eima tah kaw tyhpa tlai. Rei chiehpa hawhta sawhkha pasaina ta a ypa ama châ leipa vâta vaduapa châta cha khatino rai ta police ta patu theipa ama châ. Pachyhnoh Programme eima hneina liata â vaw hlao hrapa Hlôma khihpa satlia apakhy bâna lâthlôh liata police ta patu ei ta, Jail liata ama khô tahpa eima pahno. Kheihhawhpa jail lia ma tahpa ama pahnopasia thei leipa vâta, eima kaw siena taihta lô o tawhta pua mâh vei. He leipa chhao Marapa chanô nata chapaw pakhazie ma cha Malaysia lô o liata patâhpa ama châ. Thlahchhâkhei amâ ngiah kaw. Rai hria awpa ryhpaohpa ahmô thei leipa chhao ama y hôlô. Viasazy phana zawhzipa ta a khih asapa chhao ama y hra. Kyh amâ pachâ ngâsâ sai.
Malaysia râh khihpi Kuala Lumpur liana heta Marapasaw 6 tlai ama luh amâ vaw pabu haw hra. Ama thlâ kaw tly pi ta, ei palôh â vaw lie kaw. Ama thlâsu pha ta sawhkhâ ta Krizyhpazy châta apiepa châta anodeikua chalei abyuhpa achâ. A su pha viapa cha RM.2000 taih châta, a su phalei viapa cha RM.800 zy a châ.(Malaysia phusa tlaw 1 he India taka ta Rs. 12/- a châ. Singapore phusa tlaw 1 he India taka ta Rs. 28/- a châ). He a thihpazy hry liata satlia pakha he cha ei palôh eina hria pachai.
Myanmar tawhta phei ta zy, balyh ta zy, motor zy ta vaw sie ta, Malaysia cha avaw tlô ha hra. Anodeikua sawhkhâ pasaina leipa ta â vypa a châpa vâta hmo a phaohpa motor liata vaw kiah ta, â cha-ie chahmypa vâta ziza rohpahâhpa â pahlapa a châ thlyu aw. Motor tawhta chô a vaw daih ta, ano deikua athei hlô khao leipa ta a y. Malaysia atlô tawhta dawh 3 chhôh deita hroh ta a thi haw. He thâtih eina chho no ei ta cha ei palôh a vaw zao ngâsâ. Foreign lâ he dyuthâ vâta tlyma phasana khopa vâta tlyma a siepa châ veih ei. Ama râh duasu â chu ngasa leipa vata mothlih chhao ta a siepa hawhta ei pachâ chai. Khatino raita Police ta patu theipa nata Jail liata khô theipa ama châ.
A kipa ta chhôhkha a pakhyna chhao hnei thei veih ei. Hraihpi mo cha â kipa ta chhôhkha apakhyna hnei awpa ama khohpa vâta zâcho dawh 1:00 pata chhôhkha pakhyna ama hnei tyh.
Thokha cha ama chhôhkha Myanmar liata sisai ei ta, thokha cha chhôhkha ta aypa ama y bâ hra. Châ athaipa, Graduate chhao ama y hôlô. Thokha heih cha amâ vahpa râh hrolâ( eg. Australia, U.S.A, Canada etc) lâ sie ha ei ta ama kaw dy awpa ahâpa chhao ama y hôlô hra. Amo châta khizaw he achhaihna râh a châ pachaipa ta ei pahno.
Rei ngiaroh â chhih kawpa :
Rei chiehpa hawhta Singapore zy, Malaysia zy liata a hlawfah awpa hlâ ta cha India Marapa râh liata a hlawfah awpa he a ma khoh via. Anodeikua ama nôpo tu hawpa vâta Marapa sawzy yna Mara râh vaw pangai taraw ei ta,Muslim mo tlu chhaota vaw daodo mapi, tahpa ei vaw pahno. Ei no a vaw za ngasâ. Seih, Viachaoh , Vao zazuah ei ta chahnao chakhipa ta chaleipa tyh pi, thohkha chhochhi cha âbâh ta ama lana hlâta anao via ta chhu khoh pita, eima rai pahriasa pita ama hlao â dopa nata â kipa ta a pie leipa y pi ta, eima râh lâ azu ei ta eima satliazy ta amâ chadai pahru chiehpa nata mohnao kawpa ta, Burma mo nama nôpaw ama tlâh ma ? “ tahpa ta eima pasipasawh chiehpazy ama y hôlô. Eima Mara heih thapasana nata kyhpachâna liata eima phahlazie ei vaw pahnopasia kaw. A hluh via chhao ama châ thei, nôpona vâta India Mara râh a vaw pangai chiehpa, palôh pasa ngâsâpa ta eima vaw tao hapazy ama châ. Abeipa noh my Service liata cha Thlahpa Pathaihpa ta eina hnawpata ei pahnopa vâta India Marapa zydua vyuhpa ta Abeipa nata Centenary moh ta ngiahthaina ei haw.Atanoh taihta India Mara ta Burma Marapazy chô liata eima dolei-na ei pachâ châh ta cha Abeipa lâ angiahthaina ano eih tlai ta eimâ haw chyu awpa apeimawh kawpa ta ei pahno. Abeipa byhna daozie eima thai lei khiah India Marapazy ta Myanmar Marapa zy hnoh ta ku eima daona daihti atlô thei aw. Mosolman satlia hluhpi cha ama Mosolman heih bao awpa ta ama râh puasaipa ta Afghanistan râh ama pangai hôlô. Keimo deikua eima Mara heih palôh pasa ngâsâpa ta kô hluhpi eima vaw soh haw. Apei rima cha ! Ahra bâ suh vy.Marapa chi, Marapa râh liata khichhai hawhta ay awpa he, â ryh na tah ma ? O hmo lyu hmo kyh rai châ sala MADC liata ryureihtuhpazy chhaota ama pahnothai awpa â daih kaw.
Thlahchhâkhei ama ngiah kaw. Hezy he eima thlahchhâna liata eimâ thei pachai awpa châ sala.
1) Politice zy patypamâpa ta ama y lei nawpa ta
2) Rai hria awpa ahnei mâh leipazy ta rai hria awpa ama hnei thei nawpa ta.
3) Centenary kô liata ahluh thei chaina hawhta foreign lâ ama sie thei nawpa ta.
Atahmâ he râh 13 liata refugee hawhta ama y hai. eg. U.S.A. Canada, Australia, Denmark, Sweeden, Norway,etc.
He hiahrina he atyh nata duah achhy hra tua.
“ Pastor, keimo cha foreign liata eima thipa hapa chhaota eima sawchhâ nawhchhâ liata cha vaw kua heih thlyu aw ei ta, Burma sawhkha a chhie tu hapa vâta, India Mara râh lâ eima sawzy he vaw kua ei sala India Marapazy ta miah amâ pyh vâ ?”. atah. WARC Conference nota gender justice group discussion eima hnei nota Negro mozy ta ama Negro heih chô liata kôza hluhpi a khôpa liata atlôpa mothlih chhaota ama palôhpasana bie ama rei ngâpazy he ei mothlaw ta ei vaw hmô ngâ kaw. Burma tawhta âzupa hro â thai leipazy cha ama y tlai aw. He hawhpa chyhsazy cha eima daodo leipa chhaota pei tu vei. Anodeikua â reisi ngâsâpazy palôh eima pasasa lyma khiahtala chi â chhih kaw thei aw.
Duah pachâ tua:
Marapasawzy thlâ ei tly nota, thokha thla cha pha ngâsâ ta, anodeikua Hiakhah reih ta ropa châta, ama moh dâhdei chhao Marapa moh ta ropa châ vei. Miah chhotuhpa y leipa ei sala Marapa thlâ achâ tahpa pahno theipa châ vei.
Vailimapaw ta Marapa atahpa thokha cha Marapa atah thei khao veih ei. Keimo ta ama reih thei khai vei hr’ei sihla, âmo tah cha Mara reih he ama thei khai thlâh ha.Ama nô nata pawzy cha Mara Hlabu Biehrai he hmâh ei ta, amasawzy deikua Mara Hlabu Biehrai ama châta hnei awpa a rupa vâta Hiakhah Hlabu nata biehrai ama hmâh haw !! Azakô LYTU area châta Hlabu nata Biehrai avaw thyutuhpa zydua hnohta ‘Alyna bie’ a thata ei reih chanei. Mara Bible sâkha he Myanmar phusa ta cha Rs. 2500/- rachhôh hawhta a châ. Zawrâpa châta hnei awpa aru ngâsâ. He rairuna vâta Vailimapaw ta Marapa ta a bipa Lytu Association ta cha kheihhawhpa reih Hlabu nata Biehrai ma eima hmâh aw tahpa a pachia ei ta, Hiakhah Hlabu Biehrai hmâ awpa ta ama vaw pathlu haw. Hlabu Biehrai ama hnei thei leipa vâta reih hropa ama hmâh awpa he palôh pasa â chhih tu hapa vâta 2007 (Centenary kô) liata Bible for Myanmar padua awpa ta ECM Officers’ Committee ta eima pasaipa vâta ei ly ngaita. Saiheina a hneipa maih cha Bible nata Hlabu Centenary Edition avaw pua tita Myanmar liata Marapazy hnohta chakaona rai â hria thei aw tahpa eima pahnosa chhielie.
Mara Christian Fellowship, Malaysia:
Kô 2005 Feb,9 liata paduapa châta,ama Pastor cha Revd.John Vabei Byhna a châ. Ano he India râh liata B.Th a patlôpa châta MEC liata chhao Pastor rai a ahria thei awpa a châ. Anodeikua chakaona kawh viapa hnei awpa a khohpa vâta MEC liata apazao leipa ta Malaysia liata chakaona tlao a hriapa a châ. M.C.F.he padua leipa châ sala, Marapa saw a viavi awpa hluhpi ama y cheingei aw. Chavâta MCF heta Thlahpa lâ kyh dei châ leipa ta, sapa lâ châta phana a thata atlôkhei. Pastor chhao he Khazohpa bie ta awnanopa a pasapa dei châ leipa ta Marapa sawzy rairuna hluhpi liata baotuh pha ngaitapa a châ. Rairuna a hneipa maih ta ama rairuna ama tlôkheina, nôpaw chaipa a châ. U.N.O. vyuhpa ta rai ahriapazy, police molaipazy nata hmia pahno kawpa a châpa vâta chyhsa hluhpi châta byhnâ a châ hmeihseih. Korea Methodish Pastor ta ordination pie ta, Kuala Lumpur liata Marapasawzy apakhyna he, he Korea Pastor ta a saipa ta a pahmasapa a châ. Khazoh hmo paryhzie noâh â vaw chhih kaw. Eima râh liata hmah asaipata o hmâ awpa eima hnei thei lei nota, Asia râh liata râh hmahsiepa ta pachâpa, Malaysia khihpi Kuala Lumpur liata Marapazy ta achhyna o a saipa ta eima hnei theipa he a rôhnah tah lei theipa châ vei. He he Khazohpa raihria sai a châ. Mara Christian Fellowship liata O.B. 12 nata Executive Member 20 ama y. Ama rei â rao kaw. Ama Pastor deikua achuna â sah viapa hnei awpa a khohpa vâta pakhâna a y lei khiah atakô he USA (Washington) lâ a sie awpa a châ. Athata thlahchhâkhei suh u. Pastor awpa ama y lei khiah MCF chhao ta rairuna ahnei thei aw. Pastor Vabei Byhna he mo pakha kawpa chhao ta ei reithai ngâsâ. Pastor phapa atloh kawpa ta ei pahno.
Noâh ei tah kaw:
Xray chaleina liata amâ pasaina rakha tovyuh hnei hra awpa pahnosa he eima zu chhâpa a châ. Anodeikua ahy hmah ta Xray chalei nawpa ta baona ama za hiah tahpa lâchhâh ta kawh kha hmah ta reih tlâ veih ei. Mo to ta ama reipa cha “ ECM la Nôpaw amâ hnona, kyh miah ama pachâ vâta eima yna â hla thlâ bao nata miah tly ei ta……. “ tahpa he a châ. Ama palôh a hâhzie nata ama pitlohzie amopâ tlâh ama châ ngâsaâ. Xray chalei nawpa ta châbyh raih ei ta, Abeipa noh apakhyna liata vaw cheih chyu ei ta, akholâ cha MCF sôh tawhta maniah ama pie chhipa ta ei pahno. India phusa ta Rs. 2,20,000/- rahchhôh a châpa ta ei pahno. Ahluh nata a chyh hlâta miah ama daodona nata amâ pasaina, India Mara zy miah ama tlaichhaina he a sôh hmeiseihpa ta ei pahno. Keimo ama chô liata eima pha lei thlâ bao nata âmo eima chô liata pha tlôh ei ta noza â vaw chhih kaw. India Marapazy he miah amâ vaw palaikhei kaw. Chavâta keimo chhao palôh thiehpa phaopa ta eima Mara heihzy chô liata pha eima chhu hra awpa apha aw.
Payuna bie:
Mara Christian Fellowship, Malaysia, chhithatuhpazy nata zawpi hnohta ei bieta hnôchaipa cha, “ Sapa nata Thlahpa kyh liata Sâtâ hiatlia tlâh ta nama chakaopa vâta,Sâtâ ta parao achhuahpa ta athata a chatei aw ei” tahpa he a châ. MEC lâ chhao amâ phana rakha ta sôh ta chakaona ama vaw hnei tyh Myanmar liata ama y nota apakhy biehleipazy chhao Malaysia liata cha ama pakhy ha bâ. Krizyhpa Nô Py a padua ei ta, RM.1000 tlai ano eih ta Xray chaleina châta ama pie. Abeipa noh ta KNP moh ta pati miah ama dôhkhei. Sâtâ ta Malaysia police nata a sawhkhâna hmâpa ta a parao pathla thei nata pangiasa va na. MCF. Chhihthatuhpazy likawh liata aryh leina nata hmo hropa hmâpata deikua thlai a parao thei aw. Chavâta keimo chhao thlah a thata eima chhâ khei awpa a byuh ngâsâ.
Eima kaw tlô tawhta MCF Secretary Puhpa Neru tawhta telephone dao nata Kuala Lumpur liata Marapa pakha (Lialaipikhihpa) a thi tahpa ei pahno. Foreign liata thizy he hmo naonâhpa châ vei. Officer y tlâ ei va, a hneirôhpa y tlâ ei va ? Thlachhâna he ama hrona hnabeiseihna â pahniehhna a châ. Eima Mara heihzy ta rairuna ama tyhpa he kô hluhpi vaw pahno leipa nata, atahmâ la ei vaw pahno thai ha bâ. Eima tao theipa y hra vei sala thapasana nata apôhkhana eima padua pathi awpa â daih ngâsâ.
Bietlâhpakyuna :
Rei awpa hluhpi y hra sala bie tl2h pakyuna châta a peimawh chaipa ta ei pahnopa cha, India nata Myanmar liata Marapazy apôhkhana nata a zaokhina phapa hnei awpa he achâ. Ananopa liata zy, MTP liata zy ,M.S.O. liata zy azaokhina pha viapa nata ahrialâhna pha viapa eima hnei thei nawpa ta India Marapazy ta hmah eima la tua (initiate) awpa achâ. Literature liata chhao thapi phia a byuh. Text book ama hnei leipa vâta Marapa alphabet liata F.eima hnei ma tahpa chhao pahnopasia veih ei. He he ama nohkhihlei vâ châ vei.India Marapazy nata hrialâhna, azaokhina phapa eima hneilei vâta achâ. Eima MADC nôpawpazy chhao ta palôh ama hnei awpa abyuh ngâsâ.
India râh chhôh liata Marapa eima kawh nawpa y vei. Myanmar lia deikua eima kawh thei nawpa a y. Zatly heih awpa ta pakahpaleih phapa ta hruana ei tyh hôlô. Abeipa reisai ta châ sala. He tlupo ta eima Mara heih duasu apha lei ngaitapa liata ama y pa pahno kheileipa ta kô hluhpi eima vaw thlâh hapa he no âh â chhih kaw !
|
