|
MALAYSIA SIENA REPORT
N.Dawhniarili
ECM KNP Secretary Hqr
Khazohpa khokheina to pata, Awnanopazy thlachhana kheina vata Tari 29.3.2007 pa liana khata Rev.NC.Vabeilua, E.S (S/School) nata viasa pano Laisa PP Beinonai nata Laisa Muanpuii chhaota Malaysia pangaipata Siaha eima puasai. Delhi liata Visa zy buakhei pata varo tlai eima y tawta Tari 12.4.2007 liata Singapore pangai pita, Singapore liata Laisa Mary Ango ta Airport liata miah a vaw dy. Singapore liata eima chah chhoh zydua ano nata MCF chhithatuhpazy nata viasa richahzy ta ato zydua miah buaba khei eita, Khazoh noh ta Lai nah apakhyna liata miah ama pakhy khei. Singapore liana heta, Marahpa 50 rachhoh tlai rai hria pata ama y. MCF Singapore nata apakyhna zy hnei thei pita, eima ly ngasa. Amo heta X-Ray khaw chaleina chata Singapore Dollar 692 ( Rs.19,376/-) tlai miah ama bao. Abeipa chata ama pasaina a rona eima tah ngaita. Singapore liata eima chah chhoh zydua pati niena nata tlokiana zydua miah ama to pah khai. Keimo la apahryutuhpa dei cha pita, Abeipa ta Byhna hlupi ta a vaohei aw ei tahpa dei he eima thlachhana a cha.
Tari 18.4.2007 ta Singapore puasai pata Malaysia la Bus ta Daw 5 chhoh ara pita, my 4.00 AM liata atlapata Malaysia eima tlo. Rev. John Vabeibyhna nata a viasazy ta station liata miah vaw dy eita, Hotel liata miah ama patlosa. Ama O tlona liata patiniezy miah hrua eita, apakhyna zy hnei lyma pita, daiti miah a khi vei kaw. Malaysia liana heta Marahpa 700 hlei tlai rai hria pata ama y. Malaysia liata noh pali eima chah tawta Tari 24.4.2007 pa liata Delhi pangai pata Malaysia eima vaw puasai haw. Delhi tawta 24.4.2007 pata, eima rah pangaipata kaw pala lyma pita, Tari 27.4. pa liana khata atlapata siaha khi thlakha daihma eima puasai tawta eima kaw tlo haw. Abeipa ypana nata chhithana to hmeiseih pita, Nama thlachhakheina vata a cha tah lei thei mapi. Awnanopa zawpi zydua hno ta alyna bie eima rei hmeiseih. Malaysia nata Singapore ta X-Ray khaw chaleina chata miah ama baona tlopakhypa zydua cha Rs. 2,22,000/-hlei ( two Lakh, twenty two thousand ) tlai a cha.
Singapore nata Malaysia liata eima marah hei zyta miah ama daodona zy, miah abuakheina zy, ama pasaina zy, palohta a thei thla ha pita, Abeipa lata alyna bie rei hleikhota tao theipa hnei mapi! Keimola apahryutuhpa dei cha pita, Abeipa ta Byhna hlupita a vao hei aw ei tahpa dei he eima thlachhana a cha.
Malaysia nata Singapore liata Marapa a ypa zy he Myanmar marahpa zy cha viachai eita, India tawta a chyhta ama y hra. Ahlu via he Pasaina hnei leipa ta a ru lata a ngiapa zy cha eita, thokha zy cha Police nata patu eita, Lo-O liatazy a tah eita, rairuna hlupi ta a chado ei. Thokhazy cha rietheituna vata ama hrona a pahleipa chhao varo tlai ama y haw! Malaysia liata eima chah chhohta Marapa ronahna rah miah apangaisai hapa zy thlasu tly pita, palolie a chhi kaw. Hao rah liana haota eima marahhei mopasari tlai lu apbupa ama y haw. Rietheina nata rairuna vata rah hropa, maniah rah pangai eita, sei rai maniah rah liata a zovata ama hria. Sapa nata palohrupa sipasapa ta y eita, chido ngado pata nocharei khi ama sa. He tluta eima chikha phokha hei zy rietheipa nata sipasapa pata ama ypa ei hmo nata Abeipa ryraona pahnothai a ru eita kaw !
Chatanacho ta, ama hriapasana ty zy cha Abeipa la vaw chei eita, aly kaw pata ama hneichhohpazy ama pie pasai cha maw ! O lata ama chhohkha sanaw zy ama theina dah hawta bao eita, Awnanopa nata khitla bao a ngiahpazy, amo apakypata ama bao tyh !. Malaysia nata Singapore liata marahpa a y,pa zy he Cha a thaipa a chyhta dei ama cha, chyhsapa la pachata a nawrai kawpa zy sai ama cha. Maniah rah liata hro chichhihna su liata a ypa ama chapa vata hro dahphina, Khazohpa vana a thata ama hnei. Thokha hlupi cha India marah la vaozy sei zy, za zuapata a za tlo chiehpa zy cha eita, India marahpa zy ta reikah ngia leipa nata mohnaona a vaw tao chiehpazy sai ama cha. Chahrasala Abeipa khozie ta phana ta viari tlao miah ama tho tyh.
Sawkha phana ry liata a y pa eima chapa vata India liata marahpa a ypazy pi he palorupa ta miah ama pachy kaw. Rah phaviapa liata a ypa marahpazy chata cha ama hmopha taopa heta pahaona miah a pie kaw pata eipahno. Khazohpa khinarah nata mararah chana heta khapa chhama eima tao mah hra va ma ? Eima unaw sietanozy cho liata kheitama paloh eima phao tyh va tly ? Amo chata khapa chhama phahnaina eima hnei thei hraw va ma ? Maraland Gospel Centenary vana heta adyryhnazy apohkhana zy a sah papua thei sualua tlyma ? Keimo mopakha chyu ngiatla liata apahnie.
Ama reika thokha paloh liata a chah thla hapa cha Siaha khi nata Tipa khizy ama za tlo nata maw rei chei awpa a byuh tyhpa ama reipa he a cha. Amo la ama sawkhata Marareih achuna (Varnacular Education) liata hma awpa a pasai leipa vata, marareih ama thaina y chhohpa cha BIEHRAI nata HLABU dei he a cha, nokha cha Lytu mo yna la vaw pita, Marahrei Biehrai nata Hlabu ama hnei leipa vata, Hiakha rei ta hlazy sa pita, hiakha rei ama vaw hly haw !!
Khiatala Biehrai nata Hlabu he Marahpa chi nata pho abohna chhaichhi chata Abeipa ta miah a pie pa a cha khia maw ? India marapa hry liata Marahrei Biehrai nata Hlabu a hma leipa eima hlu kaw ba pata ala tlota, thlazo dua maw a chhi kaw !! Dua pacha tua ei su u.
Hriapasa ngaita pata eima Missionary zy ta Mararei ta Biehrai miah paliepa eita, eima hma tlo vei khia ama paloh apasa nata pangiasa a chhi. Awnanopa zawpizy ta tao awpa eima hnei hra thlyu aw na !
Thlachhanakhei awpa ta miah ama hawna zy cha hezy he a cha :-
1. Lo-o liata atah hai pazy ama pua thei nawpata,
2. Ama rah la a lie thaipa ama cha khao leipa vata, rah hropala y pasaina amah mo thei naw pata,
3. Rai hria awpa a hnei mah leipazy ta rai ama hmo thei nawpata.
Maraland Gospel Centenary heta, Marahpazy sawkha rahri ta miah pachhai chy hrasala, palorupa apohkha miah a tlokhei nawpa he ama mokha chaipa a cha.
ABEIPA TA BYHNA PIE MAWH SY
N. Dawhniarili
Secretary
KNP(H) : Siaha
|
